நெல்லையப்பர் கோவிலில் தைப்பூச திருவிழா தெப்ப உற்சவம்


நெல்லையப்பர் கோவிலில் தைப்பூச திருவிழா தெப்ப உற்சவம்
x
தினத்தந்தி 20 Jan 2022 7:46 PM GMT (Updated: 2022-01-21T01:16:56+05:30)

நெல்லையப்பர் கோவில் தைப்பூச திருவிழாவின் சிகர நிகழ்ச்சியான தெப்பத் திருவிழா வெகு விமரிசையாக நடைபெற்றது. இதில் திரளான பக்தர்கள் கலந்துகொண்டு தரிசனம் செய்தனர்.

நெல்லை:
நெல்லையப்பர் கோவில் தைப்பூச திருவிழாவின் சிகர நிகழ்ச்சியான தெப்பத் திருவிழா வெகு விமரிசையாக நடைபெற்றது. இதில் திரளான பக்தர்கள் கலந்துகொண்டு தரிசனம் செய்தனர்.

தைப்பூச விழா
தமிழகத்தில் பிரசித்தி பெற்ற சிவாலயங்களில் ஒன்றான நெல்லை டவுன் நெல்லையப்பர் காந்திமதி அம்பாள் கோவிலில் தைப்பூச திருவிழா கடந்த 9-ந் தேதி கொடியேற்றத்துடன் தொடங்கியது. 12 நாட்கள் நடைபெறும் இந்த திருவிழாவில் காலை, மாலை இருவேளையிலும் சுவாமிக்கு சிறப்பு பூஜைகளும், சிறப்பு அபிஷேகங்களும் நடைபெற்றது.
விழாவின் சிகர நிகழ்ச்சியான தெப்ப உற்சவம் நடத்துவதற்கு கோவில் நிர்வாகம் அனுமதி மறுத்தது. இந்த நிலையில் இந்து முன்னணி உள்ளிட்ட பல்வேறு அமைப்புகள் போராட்டம் நடத்தப்படும் என அறிவித்ததை தொடர்ந்து வழிகாட்டு நெறிமுறைகள் உடன் நிகழ்ச்சி நடத்த அனுமதி அளித்தது.

தெப்ப உற்சவம்
இந்த நிலையில் தெப்பத்திருவிழா டவுன் சுவாமி நெல்லையப்பர் நெடுஞ்சாலையில் சொக்கப்பனை முக்கு அருகில் தெப்பக்குளத்தில் வெகு விமரிசையாக நடைபெற்றது. சுவாமி நெல்லையப்பர், காந்திமதி அம்பாள், விநாயகர், சுப்பிரமணியர் சண்டிகேஸ்வரர் ஆகிய பஞ்ச மூர்த்திகளும் தெப்பகுளம் அருகே அமைந்துள்ள மீனாட்சி -சுந்தரேஸ்வரர் கோவிலுக்கு எழுந்தருளினர். அங்கு சிறப்பு அபிஷேகம் மற்றும் தீபாராதனை நடைபெற்றது.
தொடர்ந்து அலங்கரிக்கப்பட்ட தெப்பத்தில் சுவாமி நெல்லையப்பர், காந்திமதி அம்பாள் பஞ்ச மூர்த்திகளுடன் எழுந்தருளி தெப்பக்குளத்தில் 11 முறை வலம் வந்தனர். 11 முறை வலம் வரும் போதும் ஒவ்வொரு முறையும் மங்கல இசை, வேத மந்திரம், பதிகம் உள்ளிட்டவைகள் பாடப்பட்டது. இதில் கொரோனா நோய் தடுப்பு வழிகாட்டு நெறிமுறைகளை பின்பற்றி பக்தர்கள் கலந்து கொண்டு தரிசனம் செய்தனர்.

Next Story