மோடியை சத்ரபதி சிவாஜியுடன் ஒப்பிட்டு வீடியோ: சிவசேனா கண்டனம்

மும்பை,

சத்ரபதி சிவாஜியின் தளபதி பற்றி ‘தானாஜி’ படம் வெளியாகி வெற்றிகரமாக ஓடி கொண்டு இருக்கிறது. இந்த நிலையில் இந்த படத்தின் டிரைலர் மாற்றி அமைக்கப்பட்டு இணையதளத்தில் வெளியாகி உள்ளது.

பா.ஜனதா ஆதரவு இணையதள பக்கம் என கூறப்படும் ‘பொலிட்டிகள் கிடாவில்’ அந்த வீடியோ வெளியாகி உள்ளது. அதில் பிரதமர் மோடி சத்ரபதி சிவாஜியாகவும், அமித்ஷா சத்ரபதி சிவாஜியின் போர் படை தளபதியான தானாஜியாகவும், டெல்லி முதல்-மந்திரி அரவிந்த் கெஜ்ரிவால் எதிராளியான உதய்பான் சிங் ரதோராகவும் சித்தரிக்கப்பட்டுள்ளனர்.

டெல்லி சட்டசபை தேர்தல் நடைபெற உள்ள நிலையில், அரவிந்த் கெஜ்ரிவாலை கேலி செய்யும் வகையில் இந்த வீடியோ வெளியிடப்பட்டுள்ளது.

இந்த நிலையில் இந்த வீடியோவுக்கு சிவசேனா எம்.பி. சஞ்சய் ராவத் கண்டனம் தெரிவித்து உள்ளார். இது குறித்து அவர் கூறுகையில், “சத்ரபதி சிவாஜியின் பெயரை தவறாக பயன்படுத்துவது சரியானது அல்ல. அதை ஏற்றுக்கொள்ள முடியாது” என்றார்.