மனம் விட்டு அழுதால் கிடைக்கும் நன்மைகள்

சிலர் மன வேதனையில் இருக்கும்போது அழுதபடியே தங்களுடைய உணர்வுகளை, எண்ணங்களை கொட்டி விடுவார்கள். சிலர் மனதுக்குள்ளேயே பூட்டி வைத்துக்கொண்டு மன இறுக்கத்துடன் இருப்பார்கள். ஆனால் மனதை காயப்படுத்தும் நிகழ்வுகள் நடைபெறும்போது அழுவதுதான் நல்லது என்று ஆய்வுகள் கூறுகின்றன. பெண்கள் எளிதில் உணர்ச்சி வசப்படுவார்கள். அழுதும் விடுவார்கள்.

சராசரியாக பெண்கள் வருடத்திற்கு 30 முதல் 64 முறை அழுகிறார்கள் என்றும், ஆண்கள் 6 முதல் 17 முறை மட்டுமே அழுகிறார்கள் என்றும் ஆய்வு ஒன்று தெரிவிக்கிறது. இதனால் பெண்களை காட்டிலும் ஆண்கள்தான் அதிக மன உளைச்சலுக்கு உள்ளாகுவதாகவும் ஆய்வு கூறுகிறது. அழுவதால் உடலளவிலும், மனதளவிலும் வலி நீங்குவதாக மற்றொரு ஆய்வு குறிப்பிடுகிறது. அழும்போது கண்ணீரில் சுரக்கும் ஆக்ஸிடோசின் மற்றும் எண்டோர்பின்ஸ் மனதிற்கு அமைதியையும், வலியைத் தாங்கக் கூடிய வலிமையையும் தரும் என்று அதில் சுட்டிக்காட்டப்பட்டுள்ளது.

மனதுக்கு நெருக்கமானவர்கள் அழுது கொண்டிருந்தால் அவர்களுக்கு ஆறுதல் சொல்வது இயல்பானது. அத்தகைய ஆறுதலும், அரவணைப்பும் அவர்களுக்கு மன அமைதியை கொடுக்கும். அந்த சமயத்தில் அவர்களின் அழுகையை கட்டுப்படுத்துவதற்கு முயற்சிக்கக்கூடாது. அன்பான வார்த்தைகள் மூலமே ஆசுவாசப்படுத்த வேண்டும்.

மனதை ரணமாக்கும் நிகழ்வுகளின்போது மனம் விட்டு அழுதுவிட்டால் அதில் இருந்து படிப்படியாக மீண்டு வந்துவிட முடியும். சில நாட்களில் மனம் ரிலாக்ஸ் ஆகிவிடும். அழும்போது உடம்பில் ‘ஸ்ட்ரெஸ் ஹார்மோன் சுரந்து அது கண்ணீர் வழியாக வெளியே வந்துவிடும். இதனால் அந்த ஹார்மோன் சுரக்கும் அளவு குறைந்துவிடும் என்பதும் ஆய்வின் போது கவனத்தில் கொள்ளப்பட்டிருக்கிறது.

குழந்தைகள் அழுது கொண்டே இருந்தால் சிறிது நேரத்தில் சட்டென்று தூங்கிவிடுவார்கள். குழந்தைகள் மட்டுமல்ல பெரியவர்களுக்கும் அழுதால் தூக்கம் வரும். மனம் விட்டு அழுதாலோ, கதறி அழுதாலோ நிச்சயம் கண்ணீர் வரும். தொடர்ந்து அழுது கொண்டே இருந்தாலும் தூக்கம் கண்களை தழுவிவிடும். அழும்போது கண்களில் ஐசோஸைமி என்னும் அமிலம் சுரக்கும். அது கண்களில் உள்ள கிருமிகள் மற்றும் அழுக்குகளை நீக்கி சுத்தம் செய்துவிடும். தொடர்ச்சியாக அழும்போது வறண்ட கண்களில் ஈரப்பதம் தக்கவைக்கப்படுவதும், கண் பார்வை தெளிவடைவதும் ஆய்வில் தெரியவந்துள்ளது.