குடும்பத் தகராறில் விபரீதம் 3 குழந்தைகளை கழுத்தை நெரித்து கொன்று விட்டு தாய் தற்கொலை

வேலூர்,

வேலூர் தோட்டப்பாளையத்தை சேர்ந்தவர் தினேஷ் (வயது 30), டைல்ஸ் ஒட்டும் தொழிலாளி. இவரது மனைவி ஜீவிதா (23). இவர்களுக்கு அக்சயா (5), நந்தகுமார் (4) மற்றும் பெயரிடப்படாத 6 மாத ஆண்குழந்தை என்று 3 குழந்தைகள். தினேஷ் குடும்பத்துடன் சலவன்பேட்டை கச்சேரி தெருவில் வாடகை வீட்டில் வசித்து வந்தார்.

தினேஷ் வேலைக்கு சென்றுவிட்டு இரவில் வீடு திரும்பும்போது மதுஅருந்திவிட்டு வருவதாகவும், அதனால் கணவன்-மனைவிக்கு இடையே அடிக்கடி வாக்குவாதம் மற்றும் தகராறு ஏற்பட்டு வந்துள்ளது. சில நேரத்தில் தினேஷ் குடிபோதையில் ஜீவிதாவை அடித்து உதைத்து கொடுமைப்படுத்தியதாகவும் கூறப்படுகிறது.

குழந்தைகளை கொன்று தற்கொலை

கடந்த 10 நாட்களுக்கு முன்பு கணவருடன் ஏற்பட்ட தகராறால் ஜீவிதா கோபித்து விட்டு 3 குழந்தைகளுடன் அருகில் உள்ள தாய் வீட்டிற்கு சென்றுள்ளார். அங்கு யாரிடமும் சரியாக பேசாமல் மனவிரக்தியுடன் காணப்பட்டுள்ளார். இந்த நிலையில், நேற்று காலை மீண்டும் தனது வீட்டிற்கு வந்த ஜீவிதா தனது 3 குழந்தைகளையும் சேலையால் கழுத்தை நெரித்து கொன்றுவிட்டு மின்விசிறியில் தூக்குப்போட்டு தற்கொலை செய்து கொண்டார்.

குடும்ப தகராறில் 3 குழந்தைகளையும் கொன்று விட்டு தாய் தற்கொலை செய்து கொண்ட சம்பவம் வேலூரில் சோகத்தை ஏற்படுத்தி உள்ளது.