சீன அதிபர் மற்றும் பிரதமர் நரேந்திர மோடி சந்திப்பின் போது காஷ்மீர் பிரச்சினையைத் தவிர்க்க வாய்ப்பு
முறைசாரா உச்சிமாநாட்டின் போது சீன அதிபர் மற்றும் பிரதமர் நரேந்திர மோடி சந்திப்பின் போது காஷ்மீர் பிரச்சினையைத் தவிர்க்க வாய்ப்புள்ளது என தகவல் வெளியாகி உள்ளது.
பெய்ஜிங்
அடுத்த மாதம் சென்னை அருகே உள்ள பாரம்பரிய நகரமான மாமல்லபுரத்தில் இரண்டு நாள் முறைசாரா உச்சி மாநாடு நடைபெற உள்ளது. இதில் பிரதமர் நரேந்திர மோடி, சீன அதிபர் ஜி ஜின்பிங் சந்தித்து பேசுகிறார்கள். உச்சிமாநாட்டின் முக்கிய தேதி அக்டோபர் 12 ஆக இருக்கலாம் என இந்தியாவின் தூதர்கள் இதை தென்கிழக்கு ஆசியாவில் உள்ள தனது நண்பர்களுக்கு தெரிவித்ததாக தகவல் வெளியாகி உள்ளது.
முறைசாரா உச்சிமாநாட்டிற்கு எந்த நிகழ்ச்சி நிரலும் இல்லை என்றாலும், இரு தலைவர்களும் அனைத்து சர்வதேச பிரச்சினைகளையும் நேர்மையாக விவாதிப்பார்கள். சவூதி அரேபியா அரம்கோவின் எண்ணெய் சுத்திகரிப்பு ஆலையின் மீது ஆள் இல்லா விமான தாக்குதலை அடுத்து இரு நாடுகளுக்கும் இடையிலான வர்த்தக உறவுகள் மற்றும் மேற்கு ஆசிய நெருக்கடி ஆகியவை நிகழ்ச்சி நிரலில் இருக்கும் என்று அரசாங்க அதிகாரிகள் தெரிவித்தனர். ஈரான் இந்த தாக்குதலுக்கும் தங்களுக்கும் எந்த தொடர்பும் இல்லை என்று இந்தியாவிடம் கூறி உள்ளது. ஏமனின் ஹவுதிகள் மீது குற்றம் சாட்டி உள்ளது.
இந்த நிலையில் முறைசாரா உச்சிமாநாட்டின் போது சந்தித்து கொள்ளும் பிரதமர் நரேந்திர மோடிக்கும் - சீன அதிபர் ஜி ஜின்பிங்கிற்கும் இடையில் காஷ்மீர் விவகாரம் குறித்து விவாதிக்க வாய்ப்பு இல்லை என சீனா சூசகமாக தெரிவித்து உள்ளது.
இது குறித்து சீன வெளியுறவு அமைச்சக செய்தித் தொடர்பாளர் ஹுவா சுனிங் கூறியதாவது:-
காஷ்மீர் போன்ற விஷயங்கள் ஆக்கிரமிக்கும் ஒரு முக்கிய தலைப்பாக இருக்கும் என்று நான் நினைக்கவில்லை, அது எனது புரிதலாகவும் இருக்கலாம். ஆனால் தலைவர்களுக்கு, அவர்கள் விரும்பும் எதையும் பற்றி பேச அவர்களுக்கு சுதந்திரம் உண்டு. இரு தலைவர்களும் வெளிப்படையான நிகழ்ச்சி நிரலைத் தொடர வாய்ப்புள்ளது. இது ஒரு முறைசாரா உச்சிமாநாடு மற்றும் தலைவர்களின் சந்திப்பு என்பதால் நிகழ்ச்சி நிரலில் காஷ்மீர் விவகாரம் இருக்கிறதா என்பது எனக்குத் தெரியவில்லை.
காஷ்மீர் பிரச்சினை இந்தியாவிற்கும் பாகிஸ்தானுக்கும் இடையிலான பிரச்சினை. காஷ்மீர் தொடர்பாக ஐ.நா. தீர்மானங்கள் இருந்தன என்பது எங்களுக்குத் தெரியும். எனவே சம்பந்தப்பட்ட ஐ.நா. தீர்மானங்களின்படி இந்தியாவுக்கும் பாகிஸ்தானுக்கும் இடையிலான நட்பு மற்றும் அமைதியான பேச்சுவார்த்தைகளின் மூலம் இந்த பிரச்சினை தீர்க்கப்பட முடியும் என்று நாங்கள் நம்புகிறோம்."
சீனாவின் நல்ல அண்டை நாடுகளாக, இந்தியாவும், பாகிஸ்தானும் ஒன்றாக நிம்மதியாக வாழ முடியும். இந்தியா மற்றும் பாகிஸ்தான் ஆகிய நாடுகளும் தங்களால் முடிந்தவரை முயற்சி செய்யலாம், பேச்சுவார்த்தைகளின் மூலம் பிரச்சினையை அமைதியாக தீர்க்க எங்கள் சிறந்த முயற்சிகள் இருக்கலாம்" என்று அவர் கூறினார்.
ஆனால் செய்தித் தொடர்பாளர் இந்தியாவுக்கும், பாகிஸ்தானுக்கும் இடையிலான நேரடி பேச்சுவார்த்தைகளையும், காஷ்மீர் பிரச்சினையை தீர்ப்பதில் ஐ.நா.வின் பங்கையும் ஆதரிக்கும் சீனாவின் நிலைப்பாட்டை மீண்டும் வலியுறுத்தினார்.
கடந்த ஆகஸ்ட் 5 ந்தேதி இந்தியா காஷ்மீருக்கு சிறப்பு அந்தஸ்து வழங்கும் 370 வது பிரிவை ரத்து செய்தது. மேலும் சீனாவுடன் சர்ச்சைக்குரிய எல்லையைப் பகிர்ந்து கொள்ளும் லடாக்கிற்கு யூனியன் பிரதேச அந்தஸ்தை வழங்க முடிவு செய்தது.
இதனால் காஷ்மீர் பிரச்சினையை ஐ.நா.பாதுகாப்புக் குழுவிற்கு எடுத்துச் செல்வதில் சீனா பாகிஸ்தானை ஆதரித்தது என்பது குறிப்பிடத்தக்கது.
Related Tags :
Next Story