அமெரிக்காவில் தலையில் வாலுடன் பிறந்த நாய்க்குட்டி

நியூயார்க்,

அமெரிக்காவின் மிசூரி மாகாணம் ஜாக்சன் நகரில் உள்ள விலங்குகளை மீட்டு பராமரிக்கும் ‘மேக்ஸ் மிஷன்’ என்ற தொண்டு நிறுவனம் நாய்க்குட்டி ஒன்றை தத்தெடுத்து வளர்த்து வருகிறது. அந்த நாய்க்குட்டிக்கு நர்வால் என்று பெயரிடப்பட்டு உள்ளது.

பிறந்து 10 வாரங்கள் ஆன நர்வால் மற்ற நாய்க்குட்டிகளை போல் இல்லாமல் சற்றே வித்தியாசமாக இருப்பதால் அந்த நாய்க்குட்டி தற்போது இணையத்தில் வைரலாகி வருகிறது. அப்படி என்ன வித்தியாசம் என கேட்கிறீர்களா? அந்த நாய்க்குட்டியின் தலையில் நெற்றிக்கு முன்பக்கத்தில் வால் முளைத்திருக்கிறது. இது பார்ப்பதற்கு சற்று வித்தியாசமாக காணப்பட்டாலும், அதன் சேட்டைக்கு மட்டும் குறைவு இல்லை.

நர்வால் செய்யும் சேட்டைகளை ‘மேக்ஸ் மிஷன்’ தொண்டு நிறுவனம் தங்களது சமூக வலைத்தளத்தில் பகிர்ந்தது. இதன் மூலம் சமூக வலைத்தளங்களில் நர்வாலுக்கு தனி ரசிகர் பட்டாளம் சேர்ந்து இருக்கிறது. நெற்றியில் வாலுடன் நர்வால் சுட்டித்தனம் செய்யும் வீடியோக்கள் அதிக அளவில் பகிரப்பட்டு வருகிறது.

நெற்றியில் வால் இருப்பதால், நாய்க்குட்டிக்கு ஒன்றும் பாதிப்பு இல்லை என மருத்துவர்கள் கூறியுள்ளனர்.