2-வது ஒருநாள் கிரிக்கெட்: ஆஸ்திரேலியாவை வீழ்த்தியது இங்கிலாந்து

மான்செஸ்டர்.

ஆஸ்திரேலிய கிரிக்கெட் அணி இங்கிலாந்தில் சுற்றுப்பயணம் மேற்கொண்டு விளையாடி வருகிறது. இங்கிலாந்துக்கு எதிரான  20 ஓவர் கிரிக்கெட் தொடரை 1-2 என்ற கணக்கில் இழந்த ஆஸ்திரேலியா, 3 போட்டிகள் கொண்ட ஒரு நாள் தொடரில் விளையாடி வருகிறது. இதில் முதல் ஒருநாள் போட்டியில் ஆஸ்திரேலிய அணி வெற்றி பெற்றது. 

இந்த நிலையில், 2-வது ஒருநாள் போட்டி மான்செஸ்டரில் நடைபெற்றது. தொடரை கைப்பற்று முனைப்பில் ஆரோன் பிஞ்ச் தலைமையிலான ஆஸ்திரேலிய அணியும் , தொடரை தக்க வைக்கும் நோக்கில் இங்கிலாந்து அணியும் மோதின. இதனால், ரசிகர்கள் மத்தியில் இந்த போட்டி பெரும் எதிர்பார்ப்பை ஏற்படுத்தியது. 

இதில், டாஸ் வென்ற இங்கிலாந்து முதலில் பேட்டிங்கை தேர்வு செய்தது.  இங்கிலாந்து அணி நிர்ணயிக்கப்பட்ட 50 ஓவரில் 9 விக்கெட்டுக்கு 231 ரன்கள் எடுத்தது. இதைத்தொடர்ந்து 232 ரன்கள் எடுத்தால் வெற்றி என்ற இலக்குடன் ஆஸ்திரேலியா அணி விளையாடியது. 48.4 ஓவர்கள் மட்டுமே தாக்குப்பிடித்த  ஆஸ்திரேலிய அணி 207 ரன்களுக்கு அனைத்து விக்கெட்டுகளையும் இழந்தது.

இதையடுத்து 24 ரன்கள் வித்தியாசத்தில் வென்ற இங்கிலாந்து, ஒருநாள் தொடரை1-1 என சமன் செய்தது.

இரு அணிகளுக்கும் இடையேயான 3-வது மற்றும் கடைசி ஒருநாள் கிரிக்கெட் போட்டி வரும் 16 ஆம் தேதி நடைபெற உள்ளது.