டெஸ்ட் கிரிக்கெட்டில் நிசாங்கா, டிக்வெல்லா புதிய சாதனை

ஆன்டிகுவா,

இலங்கை- வெஸ்ட் இண்டீஸ் அணிகள் இடையிலான முதலாவது டெஸ்ட் கிரிக்கெட் போட்டி ஆன்டிகுவாவில் நடந்தது. இதில் முதல் இன்னிங்சில் முறையே இலங்கை 169 ரன்களும், வெஸ்ட் இண்டீஸ் 271 ரன்களும் எடுத்தன. 102 ரன்கள் பின்தங்கிய நிலையில் 2-வது இன்னிங்சை ஆடிய இலங்கை அணி 4-வது நாளான நேற்று முன்தினம் 476 ரன்கள் குவித்து ஆல்-அவுட் ஆகி, எதிரணிக்கு 375 ரன்களை வெற்றி இலக்காக நிர்ணயித்தது.

6-வது வரிசையில் ஆடிய அறிமுக வீரர் பதும் நிசாங்கா 103 ரன்களும் (252 பந்து, 6 பவுண்டரி), விக்கெட் கீப்பர் நிரோஷன் டிக்வெல்லா 96 ரன்களும் விளாசினர். அறிமுக டெஸ்டிலேயே சதம் அடித்த 4-வது இலங்கை வீரர் என்ற சிறப்பை 22 வயதான நிசாங்கா பெற்றார். இதற்கு முன்பு பிரன்டன் குருப்பு, கலுவிதரனா, சமரவீரா ஆகியோர் தங்களது முதலாவது டெஸ்டில் சதம் அடித்திருந்தனர். ஆனால் இவர்கள் 3 பேரும் சொந்த மண்ணில் இச்சாதனையை செய்திருந்தனர். 

எனவே அறிமுக டெஸ்டிலேயே வெளிநாட்டு மண்ணில் சதம் கண்ட முதல் இலங்கை வீரர் என்ற சாதனைக்கு நிசாங்கா சொந்தக்காரர் ஆனார். இதே போல் இதுவரை சதம் ஏதும் அடிக்காத டிக்வெல்லாவுக்கு இது 17-வது அரைசதமாகும். டெஸ்டில் சதம் அடிக்காமல் அதிக அரைசதங்கள் அடித்த சாதனையாளர் வரிசையில் இந்தியாவின் சேத்தன் சவுகானை (16 அரைசதம்) பின்னுக்கு தள்ளி டிக்வெல்லா முதலிடம் பிடித்தார்.