ஒலிம்பிக் பெண்கள் ஆக்கி தகுதி சுற்று: தொடக்க ஆட்டத்தில் இந்தியா அதிர்ச்சி தோல்வி

ராஞ்சி,

பாரீசில் ஜூலை மற்றும் ஆகஸ்டு மாதம் நடைபெறும் ஒலிம்பிக் போட்டியில் பெண்கள் ஆக்கியில் 12 அணிகள் பங்கேற்கின்றன. பெண்கள் ஆக்கி போட்டிக்கு பிரான்ஸ், ஆஸ்திரேலியா உள்பட 6 அணிகள் ஏற்கனவே தகுதி பெற்று விட்டன. மீதமுள்ள 6 அணிகள் 2 தகுதி சுற்று மூலம் தேர்வு செய்யப்படுகின்றன. இதன் ஒரு தகுதி சுற்று போட்டி ஜார்கண்ட் தலைநகர் ராஞ்சியில் நேற்று தொடங்கியது. 19-ந் தேதி வரை நடைபெறும் இந்த போட்டியில் கலந்து கொண்டுள்ள 8 அணிகள் 2 பிரிவாக பிரிக்கப்பட்டு லீக்கில் மோதுகின்றன. இந்த போட்டியில் டாப்-3 இடங்களை பிடிக்கும் அணிகள் பாரீஸ் ஒலிம்பிக் போட்டிக்கு தகுதி காணும்.

இந்த போட்டியின் தொடக்க லீக் ஆட்டத்தில் ஜெர்மனி-சிலி (ஏ பிரிவு) அணிகள் மோதின. இதில் தொடக்கம் முதலே ஆதிக்கம் செலுத்திய வலுவான ஜெர்மனி அணி 3-0 என்ற கோல் கணக்கில் தரவரிசையில் 14-வது இடத்தில் இருக்கும் சிலியை எளிதில் தோற்கடித்து போட்டியை வெற்றியுடன் தொடங்கியது. இதேபிரிவில் நடந்த மற்றொரு லீக் ஆட்டத்தில் முன்னாள் ஆசிய சாம்பியனான ஜப்பான் அணி 2-0 என்ற கோல் கணக்கில் செக்குடியரசை வென்றது. 'பி' பிரிவில் இடம் பெற்றுள்ள சவிதா தலைமையிலான இந்திய அணி தனது முதலாவது லீக் ஆட்டத்தில் தரவரிசையில் 24-வது இடத்தில் இருக்கும் அமெரிக்காவை சந்தித்தது.

விறுவிறுப்பான இந்த ஆட்டத்தில் தரவரிசையில் 6-வது இடத்தில் உள்ள இந்திய அணி பந்தை தனது கட்டுப்பாட்டில் அதிகம் வைத்து இருந்தாலும் கோல் எதுவும் அடிக்க இயலவில்லை. கடுமையான நெருக்கடி கொடுத்தாலும் அமெரிக்க அணியின் தற்காப்பு அரணை கடைசி வரை தகர்க்க முடியவில்லை. 7 பெனால்டி கார்னர் வாய்ப்புகளை இந்தியா வீணடித்தது. முடிவில் இந்திய அணி 0-1 என்ற கோல் கணக்கில் அமெரிக்காவிடம் அதிர்ச்சி தோல்வி கண்டது. அமெரிக்க அணி வீராங்கனை அபிகைல் தமெர் 16-வது நிமிடத்தில் அடித்த கோல் வெற்றியை தீர்மானிப்பதாக அமைந்தது.

முன்னதாக இதேபிரிவில் நடந்த மற்றொரு ஆட்டத்தில் நியூசிலாந்து அணி 3-0 என்ற கோல் கணக்கில் இத்தாலியை தோற்கடித்தது.

இந்திய அணி இன்று நடைபெறும் லீக் ஆட்டத்தில் நியூசிலாந்துடன் (இரவு 7.30 மணி) மோதுகிறது. மற்ற லீக் ஆட்டங்களில் சிலி-செக்குடியரசு (பகல் 12 மணி), ஜப்பான்-ஜெர்மனி (பிற்பகல் 2.30 மணி), அமெரிக்கா-இத்தாலி (மாலை 5 மணி) அணிகள் மோதுகின்றன.