தாய்லாந்து ஓபன்: இரண்டாவது சுற்றில் வெளியேறினார் சாய்னா நேவால்

தாய்லாந்து,

தாய்லாந்து தலைநகர் பாங்காக்கில், சர்வதேச பேட்மின்டன் தொடர் நடைபெற்று வருகிறது. இத்தொடரின் பெண்கள் ஒற்றையர் பிரிவின் இரண்டாவது சுற்றில் இந்திய வீராங்கனை சாய்னா நேவால் , ஜப்பானின் சயாகா டகாஹஷியை எதிர் கொண்டார். முதல் செட்டை 21-16 என கைப்பற்றிய சாய்னா நேவால், இரண்டாவது செட்டை 11-21 என இழந்தார். வெற்றியாளரை நிர்ணயிக்கும் மூன்றாவது செட்டில் 14-21 என்ற கணக்கில் தோல்வியை தழுவினார். 

மொத்தம் 48 நிமிடங்கள் நீடித்த போட்டியில் சாய்னா நேவால் 21-16, 11-21, 14-21 என்ற கணக்கில் தோல்வியடைந்து வெளியேறினார்.  பேட்மின்டன் தரவரிசையில் 9வது இடத்தில் உள்ள சாய்னா நேவால், 12வது  இடத்தில்  உள்ள சயாகா டகாஹஷியிடம் தோல்வி அடைந்தது ரசிகர்களுக்கு மிகுந்த அதிருப்தியை ஏற்படுத்தியது.

ஆண்கள் ஒற்றையர் பிரிவின் இரண்டாவது சுற்றில் இந்தியாவின் ஸ்ரீகாந்த் 21-11, 16-21, 12-21 என தாய்லாந்தின் கோசிட் பெட்பிரதாப்பிடம் வீழ்ந்தார். மற்றொரு போட்டியில் இந்தியாவின் காஷ்யப் 9-21, 14-21 என சீனதைபேயின் சோ டியன் சென்னிடம் தோல்வியடைந்தார் என்பது குறிப்பிடத்தக்கது.