தேசிய சப்-ஜூனியர் கைப்பந்து: அரியானா அணி ‘சாம்பியன்’

சென்னை,

43-வது தேசிய சப்-ஜூனியர் கைப்பந்து சாம்பியன்ஷிப் போட்டி வேலூர் மாவட்டம் காட்பாடியில் நடந்தது. இதில் ஆண்கள் பிரிவில் 26 அணிகளும், பெண்கள் பிரிவில் 17 அணிகளும் பங்கேற்றன. இதன் ஆண்கள் பிரிவு இறுதிப்போட்டியில் அரியானா அணி 25-13, 25-13, 21-25, 25-19 என்ற செட் கணக்கில் குஜராத்தை வீழ்த்தி சாம்பியன் பட்டத்தை கைப்பற்றியது. முன்னதாக நடந்த 3-வது இடத்துக்கான ஆட்டத்தில் உத்தரபிரதேச அணி 25-16, 22-25, 25-15, 16-25, 15-10 என்ற செட் கணக்கில் ராஜஸ்தானை போராடி சாய்த்தது. பெண்கள் பிரிவில் இறுதிப்போட்டியில் மேற்கு வங்காள அணி 25-21, 25-13, 25-13 என்ற நேர்செட்டில் ராஜஸ்தானை தோற்கடித்து சாம்பியன் பட்டத்தை தனதாக்கியது. 3-வது இடத்துக்கான ஆட்டத்தில் அரியானா அணி 18-25, 25-23, 25-14, 17-25, 15-13 என்ற செட் கணக்கில் தமிழகத்தை வீழ்த்தியது. பரிசளிப்பு விழாவில் இந்திய கைப்பந்து சம்மேளன சேர்மன் எஸ்.வாசுதேவன் கலந்து கொண்டு வெற்றி பெற்ற அணிகளுக்கு பரிசு கோப்பையை வழங்கினார். போட்டி அமைப்பு குழு செயலாளர் சத்யராஜ் உள்பட நிர்வாகிகள் விழாவில் கலந்து கொண்டனர்.