இண்டியன்வெல்ஸ் டென்னிஸ்: அரைஇறுதியில் பெடரர், வீனஸ் வில்லியம்ஸ்

இண்டியன்வெல்ஸ்,

அமெரிக்காவின் இண்டியன்வெல்ஸ் நகரில் சர்வதேச டென்னிஸ் போட்டி நடந்து வருகிறது. இதன் ஆண்கள் ஒற்றையர் கால்இறுதியில் நம்பர் ஒன் வீரரும், நடப்பு சாம்பியனுமான ரோஜர் பெடரர் (சுவிட்சர்லாந்து), 26-ம் நிலை வீரர் சுங் ஹயோனை (தென்கொரியா) எதிர்கொண்டார். இதில் 12 ஏஸ் சர்வீஸ் வீசி அசத்திய பெடரர் 7-5, 6-1 என்ற நேர்செட்டில் வெற்றி பெற்று அரைஇறுதிக்கு முன்னேறினார். இந்த சீசனில் தோல்வியை சந்திக்காமல் பெடரர் தொடர்ச்சியாக பெற்ற 16-வது வெற்றி இதுவாகும். இதன் மூலம் ஒரு ஆண்டில் தனது சிறந்த தொடக்கமான 2006-ம் ஆண்டு சாதனையை சமன் செய்தார். பெடரர் அடுத்து போர்னா கோரிச்சுடன் (குரோஷியா) மோதுகிறார்.

பெண்கள் ஒற்றையர் கால்இறுதி ஆட்டம் ஒன்றில் 37 வயதான வீனஸ் வில்லியம்ஸ் (அமெரிக்கா) 6-3, 6-2 என்ற நேர்செட்டில்சுவாரஸ் நவரோவை (ஸ்பெயின்) தோற்கடித்து அரைஇறுதிக்குள் அடியெடுத்து வைத்தார். மற்றொரு ஆட்டத்தில் இளம் வீராங்கனை டாரியா கசட்கினா (ரஷியா) 6-0, 6-2 என்ற நேர்செட்டில் முன்னாள் நம்பர் ஒன் வீராங்கனை ஏஞ்சலிக் கெர்பருக்கு (ஜெர்மனி) அதிர்ச்சி அளித்தார்.