டென்னிஸ்

அமெரிக்க ஓபன் டென்னிஸ்: இங்கிலாந்து வீராங்கனை எம்மா ரடுகானு ‘சாம்பியன்’ + "||" + Teen Emma Raducanu wins US Open title for first Grand Slam crown by a qualifier

அமெரிக்க ஓபன் டென்னிஸ்: இங்கிலாந்து வீராங்கனை எம்மா ரடுகானு ‘சாம்பியன்’

அமெரிக்க ஓபன் டென்னிஸ்: இங்கிலாந்து வீராங்கனை எம்மா ரடுகானு ‘சாம்பியன்’
அமெரிக்க ஓபன் டென்னிஸ் போட்டியில் தகுதி சுற்று மூலம் முன்னேறியவரான இங்கிலாந்து வீராங்கனை எம்மா ரடுகானு சாம்பியன் பட்டத்தை கைப்பற்றி புதிய உலக சாதனை படைத்துள்ளார்.
அமெரிக்க ஓபன் டென்னிஸ்
‘கிராண்ட்ஸ்லாம்’ என்ற உயரிய அந்தஸ்து பெற்ற அமெரிக்க ஓபன் டென்னிஸ் போட்டி நியூயார்க் நகரில் நடந்து வருகிறது. இதில் இந்திய நேரப்படி நேற்று நள்ளிரவு அரங்கேறிய பெண்கள் ஒற்றையர் இறுதி ஆட்டத்தில் உலக தரவரிசையில் 150-வது இடம் வகிக்கும் எம்மா ரடுகானுவும் (இங்கிலாந்து), 73-ம் நிலை வீராங்கனை லேலா பெர்னாண்டசும் (கனடா) மோதினர்.வழக்கமாக அமெரிக்க ஓபன் இறுதி சுற்றில் நட்சத்திர வீராங்கனைகளே வரிந்து கட்டுவார்கள். ஆனால் இந்த முறை முன்னணி தலைகள் உருண்டதால் காட்சிகள் எல்லாமே புதுமையாக மாறியது. போட்டித்தரநிலையில் இடம் பெறாத (டாப்-32 வீராங்கனைகள் மட்டுமே தரநிலை வழங்கப்படும்), அதுவும் ‘டீன் ஏஜ்’ மங்கைகள் சந்தித்தது வரலாற்றில் அரிதான ஒன்றாகும்.

23 ஆயிரத்துக்கும் மேற்பட்ட ரசிகர்களின் முன்னிலையில் ரடுகானுவும், பெர்னாண்டசும் ஆக்ரோஷமாக விளையாடினர். ஆனால் அதிரடியான ஷாட்டுகள் மற்றும் பந்தை லாவகமாக திருப்புவதில் சாதுர்யமாக செயல்பட்ட ரடுகானு தொடக்கம் முதலே ஆதிக்கம் செலுத்தினார். 5-3 என்ற கணக்கில் முன்னிலை வகித்த போது இடது கால் முட்டியில் காயம் ஏற்பட்டு லேசாக ரத்தம் வழிந்தது. அதற்கு சிகிச்சை எடுத்துக் கொண்டு விளையாடிய போதிலும் அவரது உத்வேகம் குறையவில்லை. முதல் செட்டை 6-4. என்ற கணக்கில் கைப்பற்றிய ரடுகானு 2-வது செட்டில் 1-2 என்று பின்தங்கிய பிறகு மீண்டெழுந்தார். இறுதியில் அருமையான ஒரு ஏஸ் சர்வீஸ் போட்டு வெற்றிக்கனியை பறித்தார்.

ரடுகானு ‘சாம்பியன்’
1 மணி 51 நிமிடங்கள் நீடித்த விறுவிறுப்பான இந்த மோதலில் எம்மா ரடுகானு 6-4, 6-3 என்ற நேர் செட் கணக்கில் லேலா பெர்னாண்டசை தோற்கடித்து முதல்முறையாக கிராண்ட்ஸ்லாம் பட்டத்தை உச்சிமுகர்ந்தார். வாகை சூடிய ரடுகானு ரூ.18½ கோடியையும், 2-வது இடம் பிடித்த லேலா பெர்னாண்டஸ் ரூ.9¼ கோடியையும் பரிசுத்தொகையாக அள்ளினர்.

இந்த வெற்றியின் மூலம் 18 வயதான எம்மா ரடுகானு பல்வேறு சாதனைகளுக்கு சொந்தக்காரர் ஆகியுள்ளார். ரடுகானு அமெரிக்க ஓபனில் நேரடியாக பிரதான சுற்றில் கால்பதிக்கவில்லை. தகுதி சுற்றில் 3 ஆட்டங்களிலும் நேர் செட்டுகளில் வெற்றி கண்டு அதன் மூலம் பிரதான சுற்றை வந்தடைந்தார். பிரதான சுற்றில் 7 ஆட்டங்களிலும் வெற்றியை குவித்ததோடு ஒரு செட்டை கூட இழக்கவில்லை. ‘கிராண்ட்ஸ்லாம் ’ ஒற்றையர் வரலாற்றில் ஒரு தகுதி நிலை வீராங்கனை மகுடம் சூடியது இதுவே முதல் நிகழ்வாகும். அத்துடன் 2014-ம் ஆண்டு அமெரிக்காவின் செரீனா வில்லியம்சுக்கு பிறகு அமெரிக்க ஓபனில் எந்த செட்டையும் இழக்காமல் பட்டத்தை கைப்பற்றியது இவர் தான். 2004-ம் ஆண்டு ரஷியாவின் மரிய ஷரபோவா தனது 17 வயதில் விம்பிள்டன் டென்னிசில் பட்டத்தை ருசித்தார். அதன் பிறகு இளம் வயதில் கிராண்ட்ஸ்லாம் பட்டத்தை வென்றவராகவும் ரடுகானு திகழ்கிறார்.

44 ஆண்டு காத்திருப்பு முடிவு
தனது முதல் கிராண்ட்ஸ்லாம் போட்டியாக கடந்த ஜூன்-ஜூலையில் நடந்த விம்பிள்டனில் பங்கேற்ற ரடுகானு அதில் 4-வது சுற்றில் தோல்வி அடைந்தார். அதைத் தொடர்ந்து தனது 2-வது கிராண்ட்ஸ்லாம் வாய்ப்பிலேயே முன்னணி வீராங்கனைகளை புரட்டியெடுத்து பட்டத்தை தட்டிச்சென்றுள்ளார். இதன் மூலம் தனது 2-வது கிராண்ட்ஸ்லாம் தொடரிலேயே பட்டத்தை வென்ற முதல் வீராங்கனை என்ற பெருமையும் இவரது வசம் ஒட்டிக்கொண்டது. அவரது முதல் சர்வதேச டென்னிஸ் கோப்பையே கிராண்ட்ஸ்லாம் பட்டமாக அமைந்திருப்பது இன்னொரு கூடுதல் சிறப்பாகும்.

எல்லாவற்றுக்கும் மேலாக 44 ஆண்டுகளாக இங்கிலாந்து வீராங்கனை ‘கிராண்ட்ஸ்லாம்’ பட்டத்தை வென்றதில்லை என்ற நீண்ட கால ஏக்கத்தையும் தணித்துள்ளார். கடைசியாக 1977-ம் ஆண்டு இங்கிலாந்து வீராங்கனை விர்ஜினியா வேட் விம்பிள்டன் பட்டத்தை வென்று இருந்தார்.

தரவரிசையில் ஏற்றம்
வெற்றிக்கு பிறகு ரடுகானு கூறுகையில், ‘நாங்கள் இருவரும் இரு வாரங்களாக அச்சமின்றி டென்னிஸ் விளையாடினோம். மேலும் பல தொடர்களில் இறுதிப்போட்டிகளில் நேருக்கு நேர் சந்திப்போம் என்று நம்புகிறேன். இந்த போட்டியில் மிகுந்த உற்சாகமுடன் ஆடினேன். கிராண்ட்ஸ்லாம் வெல்ல வேண்டும் என்ற எனது சிறு வயது கனவு நனவாகியுள்ளது. இறுதி சுற்றில் இரு இளம் வீராங்கனைகள் மோதியதன் மூலம் எதிர்கால பெண்கள் டென்னிஸ் எவ்வளவு வலுவானது என்பதை காட்டியுள்ளோம்’ என்று குறிப்பிட்டார்.

லேலா பெர்னாண்டஸ் கூறுகையில், ‘அமெரிக்க ஓபனில் நான் விளையாடிய விதத்தை நினைத்து மிகவும் பெருமைப்படுகிறேன். மீண்டும் இங்கு வந்து இறுதிப்போட்டியில் விளையாடி கோப்பையை கையில் ஏந்துவேன் என்ற நம்பிக்கை இருக்கிறது’ என்றார். இன்று வெளியாகும் புதிய தரவரிசை பட்டியலில், 150-வது இடத்தில் உள்ள எம்மா ரடுகானு 23-வது இடத்துக்கு முன்னேறுகிறார். இதே போல் 19 வயதான லேலா பெர்னாண்டஸ் 45 இடங்கள் உயர்ந்து 28-வது இடத்தை பிடிக்கிறார்.

தொடர்புடைய செய்திகள்

1. அமெரிக்க ஓபன் டென்னிஸ்: ஜோகோவிச் இறுதிப்போட்டிக்கு தகுதி
இறுதிப்போட்டியில் ரஷ்ய வீரர் மெத்வதேவை ஜோகோவிச் எதிர்கொள்ள உள்ளார்.
2. அமெரிக்க ஓபன் டென்னிஸ்; மெட்வதேவ் இறுதிப்போட்டிக்கு முன்னேற்றம்
கிராண்ட்ஸ்லாம் அந்தஸ்து பெற்ற அமெரிக்க ஓபன் டென்னிஸ் போட்டி நியூயார்க்கில் நடந்து வருகிறது.
3. அமெரிக்க ஓபன் டென்னிஸ்: அரைஇறுதியில் மெட்விடேவ், சபலென்கா
அமெரிக்க ஓபன் டென்னிஸ் போட்டியில் ரஷிய வீரர் மெட்விடேவ், பெலாரஸ் வீராங்கனை சபலென்கா ஆகியோர் அரைஇறுதிக்கு முன்னேறினார்கள்.
4. அமெரிக்க ஓபன் டென்னிஸ்: 12-வது முறையாக கால்இறுதிக்கு முன்னேறினார் ஜோகோவிச்
அமெரிக்க ஓபன் டென்னிஸ் போட்டியில் செர்பிய வீரர் ஜோகோவிச் 12-வது முறையாக கால்இறுதிக்கு முன்னேறியுள்ளார்.
5. அமெரிக்க ஓபன் டென்னிஸ்: காலிறுதிக்கு முன்னேறினார் மெட்வதேவ்
அமெரிக்க ஓபன் டென்னிஸ் போட்டி நியூயார்க் நகரில் நடைபெற்று வருகிறது.