எஸ்.வி.சேகருக்கு நடிகர் விஷால் கண்டனம்

பெண் பத்திரிகையாளரை இழிவுபடுத்தி பேசியது தொடர்பாக நடிகர் எஸ்.வி.சேகருக்கு நடிகர் சங்க பொதுச்செயலாளர் விஷால் கண்டனம் தெரிவித்து இருக்கிறார். இது தொடர்பாக அவர் தனது ‘டுவிட்டர்’ பக்கத்தில் கூறியிருப்பதாவது:-

“இந்தியா, குறிப்பாக தமிழ்நாட்டில் கடந்த சில ஆண்டுகளாக பெண்கள் மீடியா துறைகளில் வேகமாக வளர்ந்து வருகிறார்கள். பெண்கள் முன்னேற்றத்தில் பெரியார் கண்ட கனவு நினைவாகி வரும் நேரத்தில், மீடியாவில் பணிபுரியும் சகோதரிகளை களங்கப்படுத்தும் வகையில், அவதூறு பரப்பிய எஸ்.வி.சேகரின் செயல் கடும் கண்டனத்துக் குரியது.

பத்திரிகை துறையில் எனக்கு நிறைய நண்பர்கள் இருக்கிறார்கள். அவர்கள் மனது இந்த அவதூறால் எவ்வளவு புண்பட்டிருக்கும் என்பதை உணர்வேன். ஒரு நடிகனாக அல்லாமல், சக நண்பனாக கடும் கோபத்துக்குள்ளாகி இருக்கிறேன்.” இவ்வாறு விஷால் கூறியிருக்கிறார்.