சினிமா கேளிக்கை வரி ரத்து குறித்து முதல்-அமைச்சர் நல்ல முடிவை அறிவிப்பார் அமைச்சர் கடம்பூர் ராஜூ பேட்டி

கோவில்பட்டி, 

கொரோனா காலத்தையொட்டி திரையரங்குகள் இயங்காமல் இருந்தபோது, எந்த வரியும் விதிக்கப்படவில்லை. கேளிக்கை வரியை ரத்து செய்வது குறித்த திரையரங்கு உரிமையாளர்களின் கோரிக்கை தமிழக முதல்-அமைச்சரின் கவனத்துக்கு கொண்டு செல்லப்பட்டுள்ளது. இது தொடர்பாக அவர் நல்ல முடிவை அறிவிப்பார்.

பொங்கல் பண்டிகையையொட்டி நடிகர் விஜய் நடித்துள்ள மாஸ்டர் திரைப்படத்துக்கு கூடுதல் காட்சிகளுக்கு மட்டும் தான் அனுமதி வழங்கப்பட்டுள்ளது. முறைப்படுத்தப்பட்ட கட்டணம் தான்வாங்க வேண்டும் என்பது அரசின்விதி. அதைமீறி நேரடியாகவோ, மறைமுகமாகவோ கூடுதல் கட்டணம் வசூலித்தால் நடவடிக்கை எடுக்கப்படும்.

தட்கல் டிக்கெட்

திரையரங்குகளில் தட்கல் டிக்கெட் வழங்கும் முறையை செயல்படுத்துவது தொடர்பாக, முதல்-அமைச்சரின் ஆலோசனையின்பேரில் நான், வணிகவரித்துறை அமைச்சர், தலைமை செயலாளர், உள்துறை செயலாளர் உள்ளிட்ட அதிகாரிகளுடன் 3 சுற்று பேச்சுவார்த்தை நடத்தி உள்ளோம்.

தட்கல் டிக்கெட் எவ்வளவு நிர்ணயம் செய்யலாம் என திரையரங்கு உரிமையாளர்கள், திரைப்பட தயாரிப்பாளர் சங்கத்திடமும் கேட்டுள்ளோம். இந்த திட்டம் பரிசீலனையில் உள்ளது. கூடிய விரைவில் திரையரங்குகளுக்கான தட்கல் டிக்கெட் முறை அமல்படுத்தப்படும்.

கமல்ஹாசன் மீது பாய்ச்சல்

நடிகர் கமல்ஹாசன் அரசியலுக்கு வந்ததற்கு ஏதாவது சொல்லவேண்டும் என்பதற்காக ஏதேதோ சொல்கிறார். அ.தி.மு.க. நல்லாட்சி வழங்கியதால்தான் 1977-ல் இருந்து 10 முறை தேர்தலை சந்தித்து, அதில் 7 முறை வெற்றி பெற்றுள்ளது. நல்லாட்சி வழங்கியதால் தான் மக்கள் ஆட்சிக்கு கொண்டு வருகின்றனர். மக்களை ஏமாளிகள், விவரமில்லாதவர்கள் என கூறுகிறாரா?. நடைபெறவுள்ள தேர்தல், கமல்ஹாசனுக்கு தக்கபாடத்தை புகட்டி, அரசியலுக்கு லாயக்கில்லை என மக்களால் விரட்டப்படக்கூடிய தேர்தலாக அமையும். இவரை மக்கள் விரும்பி அரசியலுக்கு அழைத்தனரா?. அரசியல் கட்சி தொடங்கிதற்கு ஒரு சாக்குபோக்கு சொல்ல வேண்டும். இந்த தேர்தல் கமல்ஹாசனுக்கு முற்றுப்புள்ளி வைக்கும் தேர்தலாக அமையும்.

இவ்வாறு அவர் கூறினார்.