தினத்தந்தி புகார் பெட்டி

சாலை சீரமைக்கப்படுமா?

தஞ்சை மருத்துவக்கல்லூரி சாலை 38-வது வார்டு விசாலாட்சி நகரில் தார்சாலை குண்டும், குழியுமாக மிகவும் மோசமான நிலையில் உள்ளது. இதனால் இருசக்கர வாகனத்தில் செல்வோர் நிலை தடுமாறி கீழே விழுந்து பலத்த காயம் அடைகின்றனர். முதியவர்களும், பொதுமக்களும் நடந்து செல்ல மிகவும் சிரமப்படுகின்றனர். மழை காலத்தில் மழை தண்ணீர் தேங்கி சேறும் சகதியுமாக மாறிவிடுகிறது. இதனால் கொசுக்கள் உற்பத்தியாகி தொற்றுநோய் பரவும் அபாயம் உள்ளது. எனவே சம்பந்தப்பட்ட அதிகாரிகள் குண்டும், குழியுமான சாலையை சீரமைத்து தர வேண்டும் என்று பொதுமக்கள் கோரிக்கை விடுத்து உள்ளனர்.

-பொதுமக்கள், விசாலாட்சி நகர்.