விலங்குகளின் தாகம் தீர்க்க 17 குளங்களை கட்டிய கர்நாடகாவை சேர்ந்த கல்மனே காமேகவுடா காலமானார்!

மாண்டியா,

17 குளங்கள் அமைத்து நாட்டின் கவனத்தை ஈர்த்த தாசனதொட்டி கிராமத்தைச் சேர்ந்த கல்மனே காமேகவுடா(86) திங்கள்கிழமை (17ம் தேதி) அதிகாலை உடல்நலக்குறைவால் காலமானார்.

ஆடு மேய்க்கும் தொழிலில் உள்ள இவர், வெங்கட கவுடா மற்றும் ராஜம்மா ஆகியோரின் மகன் ஆவார். கல்வியறிவு இல்லாவிட்டாலும், சுற்றுப்புறச் சூழல் பற்றிய அறிவு வளம் பெற்றவர். விலங்குகள் மற்றும் பறவைகள் தண்ணீருக்காக போராடக்கூடாது என்பதற்காக சொந்த பணத்தில் 16 குளக்கரைகளை கட்டியுள்ளார். மாளவல்லி பகுதியில் பல விலங்குகள் மற்றும் பறவைகள் பயனடைந்துள்ளன.

தரிசு நிலங்களில் ஏரிகள் கட்டி நிலத்தடி நீரை பெருக்க வேண்டும் என்ற அவரது தொலைநோக்கு பார்வையை நாட்டின் பிரதமர் நரேந்திர மோடியே பாராட்டினார். இந்நிலையில், தனது மாதாந்திர வானொலி நிகழ்ச்சியான மன் கி பாத் நிகழ்ச்சியில் காமேகவுடாவை புகழ்ந்து பேசினார். இதனால் காமேகவுடா நாடு முழுவதும் அறியப்பட்டார்.

காமேகவுடாவின் முயற்சியால் இந்த ஏரிகளால் சுற்றுவட்டாரப் பகுதி பசுமையாக காட்சியளிக்கிறது என்று பிரதமர் மோடி கூறியிருந்தார்.அவரை நவீன பகீரதன் என்று அழைத்தார்.

சர்வதேச செய்தி ஊடகமான 'அசோசியேட்டட் பிரஸ்' நீண்ட செய்தியை வெளியிட்டு காமேகவுடாவின் பெயரை நாடு மற்றும் வெளிநாடுகளில் பரப்பியது.

காமேகவுடா தனது சொந்த பணத்தில் 17 ஏரிகளை தாகத்தில் வாடும் விலங்குகள் மற்றும் பறவைகளுக்காக கட்டி அனைவருக்கும் முன்மாதிரியாக திகழ்கிறார். காமேகவுடா ஒருமுறை தனது ஆடுகளை மேய்க்க சென்றபோது தண்ணீரின் முக்கியத்துவத்தை உணர்ந்தார்.அவர் தனது வாழ்நாள் முழுவதும் உழைத்து சம்பாதித்த பணத்தை சுற்றுச்சூழலுக்காக செலவிட்டார்.

ஏரியை கட்டுவதற்கான உத்வேகம் எப்படி கிடைத்தது என்ற கேள்விக்கு காமேகவுடா மிகுந்த ஆர்வத்துடன் பதிலளித்தார். "நான் ஆடு மேய்த்த குண்டூர் மலையைச் சுற்றி எங்கும் தண்ணீர் இல்லை. 20 ஆண்டுகளுக்கு முன்பு மலையில் இருந்தபோது தாகமாக இருந்தது. அருகில் உள்ள வீட்டிற்கு சென்று தண்ணீர் கேட்டு குடித்து உயிரை காப்பாற்றினேன்.

மனிதனாகிய நான் இதைச் செய்தேன். ஆனால் விலங்குகளின் நிலைமை என்ன? ஆகவே அங்கு ஒரு ஏரியை உருவாக்கத் தொடங்கினேன்" என்று அவர் கூறினார்.

காமேகவுடா மலையில் ஏரி தோண்டுவதை பார்த்த பலரும் கேலி செய்தனர். அவர் பைத்தியம் பிடித்தவர் என்ற முடிவுக்கு சிலர் வந்திருந்தனர். ஆனால் அவரது முயற்சியால் சுற்றுவட்டாரப் பகுதி பசுமையாக காட்சியளிக்கிறது.காமேகவுடா மலையில் ஏரி தோண்டுவதை தடுக்க, 2017இல் கிராம மக்கள் சிலர் அவரை ஆயுதங்களால் தாக்கியதில் வலது காலில் காயம் ஏற்பட்டதால் காமேகவுடாவின் உடல்நிலை மோசமடைந்தது.

யோகா தினத்திற்காக மைசூர் வந்துள்ள பிரதமரை சந்திக்க காமேகவுடா விருப்பம் தெரிவித்திருந்தார். ஆனால உடல் நலக்குறைவு காரணமாக அது முடியவில்லை. காமேகவுடாவுக்கு ராஜ்யோத்சவா விருது உட்பட பல விருதுகள் மற்றும் பரிசுகள் வழங்கப்பட்டுள்ளன.

கர்நாடக முதல்வர் பசவராஜ் பொம்மை காமேகவுடாவை 'ஜல ருஷி' (நீர் முனிவர்) என்று வர்ணித்தார். மறைந்த காமேகவுடாவுக்கு அஞ்சலி செலுத்தி அவரை "நவீன பகீரதன் " என்று அழைத்தார்.