ஈரோடு அரசு பள்ளியில்காலை உணவு திட்டத்தை கலெக்டர் ஆய்வு

தமிழ்நாட்டில் உள்ள அரசு பள்ளிக்கூடங்களில் முதலாம் வகுப்பு முதல் 5-ம் வகுப்பு வரை படிக்கும் மாணவ-மாணவிகளுக்கு காலை உணவு திட்டத்தை முதல்-அமைச்சர் மு.க.ஸ்டாலின் 2 கட்டங்களாக தொடங்கி வைத்தார். ஈரோடு மாவட்டத்தில் உள்ள 1,079 பள்ளிக்கூடங்களில் படிக்கும் 51 ஆயிரத்து 751 மாணவ-மாணவிகள் பயன்பெற்று வருகின்றனர். இந்தநிலையில் ஈரோடு மாவட்ட கலெக்டர் ராஜகோபால் சுன்கரா ஈரோடு காவிரி ரோட்டில் உள்ள மாநகராட்சி நடுநிலை பள்ளிக்கூடத்தில் நேற்று காலை திடீரென ஆய்வு நடத்தினார். அப்போது மாணவ-மாணவிகளுக்கு வழங்கப்பட்ட உணவை அவரும் வாங்கி ருசி பார்த்தார். தொடர்ந்து காலை உணவு திட்டத்துக்காக உருவாக்கப்பட்டு உள்ள செல்போன் செயலியின் செயல்பாடுகளையும் ஆய்வு நடத்தினார்.

ஈரோடு பெரும்பள்ளம் ஓடையில் ஸ்மார்ட் சிட்டி திட்டத்தின் கீழ் ரூ.200 கோடி செலவில் 12½ கிலோ மீட்டர் தூரத்துக்கு நடந்து வரும் சீரமைப்பு பணிகளையும் கலெக்டர் ஆய்வு செய்தார். இந்த ஆய்வின்போது மாநகராட்சி ஆணையாளர் ஜானகி ரவீந்திரன், மாநகர பொறியாளர் விஜயகுமார், கலெக்டர் நேர்முக உதவியாளர் (சத்துணவு) ரமேஷ், மாநகா் நல அதிகாரி பிரகாஷ் ஆகியோர் உடனிருந்தனர்.