ரஞ்சி கிரிக்கெட்: மும்பை அணி தடுமாற்றம்

நாக்பூர்,

ரஞ்சி கிரிக்கெட் தொடரில் நடப்பு சாம்பியன் விதர்பா- மும்பை அணிகள் (ஏ பிரிவு) இடையிலான லீக் ஆட்டம் நாக்பூரில் நடந்து வருகிறது. முதலில் பேட் செய்த விதர்பா அணி தொடக்க நாளில் 4 விக்கெட் இழப்புக்கு 389 ரன்கள் எடுத்திருந்தது. இந்த நிலையில் 2-வது நாளான நேற்று தொடர்ந்து ஆடிய விதர்பா முதல் இன்னிங்சில் 511 ரன்கள் குவித்து ஆல்-அவுட் ஆனது. அடுத்து தனது முதல் இன்னிங்சை தடுமாற்றத்துடன் தொடங்கிய மும்பை அணி ஆட்ட நேர முடிவில் 6 விக்கெட் இழப்புக்கு 169 ரன்கள் எடுத்துள்ளது. கேப்டன் சித்தேஷ் லாட் (3 ரன்), ஸ்ரேயாஸ் அய்யர் (0), விக்கெட் கீப்பர் ஆதித்ய தாரே (12 ரன்) ஏமாற்றம் அளித்தனர்.

கொல்கத்தா ஈடன்கார்டனில் நடக்கும் டெல்லிக்கு எதிரான லீக் ஆட்டத்தில் (பி பிரிவு) 2-வது நாளான நேற்று தனது முதல் இன்னிங்சை ஆடிய பெங்கால் அணி 220 ரன்னில் ஆல்-அவுட் ஆனது. பின்னர் 20 ரன்கள் முன்னிலையுடன் 2-வது இன்னிங்சை விளையாடிய டெல்லி அணி நேற்றைய முடிவில் 2 விக்கெட் இழப்புக்கு 41 ரன்கள் எடுத்துள்ளது. 3-வது நாள் ஆட்டம் இன்று நடைபெறும்.