டென்னிஸ் சாம்பியன்ஷிப்: பெடரர் வெற்றி; நடால் தோல்வி

டாப்-8 வீரர்கள் மட்டுமே பங்கேற்றுள்ள ஏ.டி.பி. இறுதிசுற்று எனப்படும் ஆண்கள் டென்னிஸ் சாம்பியன்ஷிப் போட்டி லண்டனில் நடந்து வருகிறது. இதில் ‘போர்க்’ பிரிவில் இடம் பெற்றுள்ள 6 முறை சாம்பியனான ரோஜர் பெடரர் (சுவிட்சர்லாந்து) நேற்று நடந்த ஆட்டத்தில் 7-6 (7-2), 6-3 என்ற நேர் செட் கணக்கில் பெரேட்டினியை (இத்தாலி) தோற்கடித்தார். இந்த வெற்றியின் மூலம் பெடரர் அரைஇறுதி வாய்ப்பை தக்க வைத்துக் கொண்டார். தனது முதல் ஆட்டத்தில் டொமினிக் திம்மிடம் (ஆஸ்திரியா) தோல்வி கண்ட பெடரர் கடைசி லீக்கில் 2-ம் நிலை வீரர் நோவக் ஜோகோவிச்சை (செர்பியா) எதிர்கொள்கிறார்.

 

  முன்னதாக நேற்று முன்தினம் இரவு ‘அகாசி’ பிரிவில் நடந்த ஒரு ஆட்டத்தில் நம்பர் ஒன் வீரரான ரபெல் நடால் (ஸ்பெயின்) 2-6, 4-6 என்ற நேர் செட் கணக்கில் நடப்பு சாம்பியன் அலெக்சாண்டர் ஸ்வெரேவிடம் (ஜெர்மனி) பணிந்தார். ஸ்வெரேவுக்கு எதிராக நடால் சந்தித்த முதல் தோல்வி இது தான். இதற்கு முன்பு அவருக்கு எதிராக மோதிய 5 ஆட்டங்களிலும் வெற்றி கண்டிருந்தார். நடால் கூறுகையில், ‘வயிற்றில் ஏற்பட்ட காயத்துக்கும், தோல்விக்கும் சம்பந்தமில்லை. வயிற்றில் இப்போது எனக்கு வலி இல்லை. எதிராளிக்கு சவால் கொடுக்கும் அளவுக்கு நான் விளையாடவில்லை. அது தான் தோல்விக்கு காரணம்’ என்றார்.