ஆஸ்திரேலிய ஓபன் டென்னிஸ்: கால்இறுதியில் நடால், ஆஷ்லி பார்ட்டி அதிர்ச்சி தோல்வி

மெல்போர்ன்,

மெல்போர்னில் நடந்து வரும் ஆஸ்திரேலிய ஓபன் டென்னிஸ் போட்டி இறுதிகட்டத்தை நெருங்கி விட்டது. இதில் நேற்று நடந்த ஆண்கள் ஒற்றையர் பிரிவு கால்இறுதி ஆட்டம் ஒன்றில் உலக தரவரிசையில் 4-வது இடத்தில் இருக்கும் ரஷிய வீரர் டேனில் மெட்விடேவ், 8-வது இடத்தில் உள்ள சக நாட்டு வீரர் ஆந்த்ரே ரூப்லெவை சந்தித்தார்.

2 மணி 5 நிமிடம் நடந்த இந்த ஆட்டத்தில் மெட்விடேவ் 7-5, 6-3, 6-2 என்ற நேர்செட்டில் ரூப்லெவை வீழ்த்தி முதல்முறையாக அரைஇறுதிக்குள் அடியெடுத்து வைத்தார். சர்வதேச போட்டியில் மெட்விடேவ் தொடர்ச்சியாக பெற்ற 19-வது வெற்றி இதுவாகும்.

மற்றொரு ஆட்டத்தில் 20 கிராண்ட்ஸ்லாம் பட்டம் வென்றவரும், தரவரிசையில் 2-ம் இடம் வகிப்பவருமான ஸ்பெயின் வீரர் ரபெல் நடால், 6-ம் நிலை வீரரான சிட்சிபாசை (கிரீஸ்) எதிர்கொண்டார். இதில் முதல் இரு செட்களை பறிகொடுத்த சிட்சிபாஸ், பீனிக்ஸ் பறவை போல் வெகுண்டெழுந்து அடுத்த 3 செட்களையும் தன்வசப்படுத்தி அட்டகாசப்படுத்தினார். 3-வது செட்டில் டைபிரேக்கரின் ஆரம்பத்தில் நடால் வழக்கத்துக்கு மாறாக செய்த 3 தவறுகளை தனக்கு சாதகமாக்கிய சிட்சிபாஸ் ஆட்டத்தின் போக்கையும் தன்பக்கம் திருப்பினார். 4 மணி 5 நிமிடம் நீடித்த இந்த யுத்தத்தில் சிட்சிபாஸ் 3-6, 2-6, 7-6 (7-4), 6-4, 7-5 என்ற செட் கணக்கில் நடாலை வீழ்த்தி 2-வது முறையாக அரைஇறுதிக்குள் நுழைந்தார். கிராண்ட்ஸ்லாம் போட்டியில் நடாலுக்கு எதிராக முதல் 2 செட்களை இழந்து அதன் பிறகு அவரை ஒரு வீரர் வீழ்த்துவது இது 2-வது முறையாகும். அரைஇறுதியில் சிட்சிபாஸ்-மெட்விடேவ் பலப்பரீட்சை நடத்துகிறார்கள்.

பெண்கள் ஒற்றையர் பிரிவின் கால்இறுதி ஆட்டம் ஒன்றில் தரவரிசையில் 27-வது இடத்தில் உள்ள செக்குடியரசு வீராங்கனை கரோலினா முசோவா, ‘நம்பர் ஒன்’ நட்சத்திரமான ஆஷ்லி பார்ட்டியை (ஆஸ்திரேலியா) எதிர்கொண்டார். முதல் செட்டில் எளிதில் சரண் அடைந்த முசோவா அடுத்த 2 செட்களிலும் எழுச்சி பெற்று அபாரமாக செயல்பட்டு ஆஷ்லி பார்ட்டிக்கு அதிர்ச்சி அளித்தார். 1 மணி 57 நிமிடம் நடந்த இந்த ஆட்டத்தில் முசோவா 1-6, 6-3, 6-2 என்ற செட் கணக்கில் ஆஷ்லி பார்ட்டியை வீழ்த்தி முதல்முறையாக அரைஇறுதிக்கு தகுதி பெற்றார். இந்த ஆண்டில் தோல்வியை தொடாத முசோவா தொடர்ச்சியாக ருசித்த 8-வது வெற்றி இதுவாகும். முந்தைய சுற்றுகளில் கரோலினா பிளிஸ்கோவா ( செக்குடியரசு), மெர்டென்ஸ் (பெல்ஜியம்) ஆகியோரை அடுத்தடுத்து சாய்த்த முசோவா கால்இறுதி வரை ஒரு செட்டையும் இழக்கவில்லை என்பது குறிப்பிடத்தக்கது.

மற்றொரு கால்இறுதியில் தரவரிசையில் 24-வது இடத்தில் இருக்கும் அமெரிக்க வீராங்கனை ஜெனிபர் பிராடி சறுக்கலை சமாளித்து 4-6, 6-2, 6-1 என்ற செட் கணக்கில் சக நாட்டு வீராங்கனை ஜெசிகா பெகுலாவை விரட்டியடித்து அரைஇறுதி சுற்றை முதல்முறையாக எட்டினார். அரைஇறுதியில் ஜெனிபர் பிராடி-கரோலினா முசோவா மோதுகிறார்கள். ஊரடங்கு காரணமாக கடந்த 5 நாட்களுக்கு பிறகு இந்த போட்டியை காண நேற்று முதல் மீண்டும் ரசிகர்களுக்கு அனுமதி அளிக்கப்பட்டதால் போட்டி களைகட்டியது.