2 நடிகர்களுக்கு கொரோனா தொற்று உறுதி

பிரபல வங்காள நடிகர் சவுமித் சாட்டர்ஜி கொரோனா தொற்றில் சிக்கி உள்ளார். இவருக்கு சில தினங்களுக்கு முன்பு உடல்நலக்குறைவு ஏற்பட்டு பரிசோதனையில் கொரோனா பாதிப்பு உறுதியானது. இதையடுத்து கொல்கத்தாவில் உள்ள தனியார் மருத்துவமனையில் அனுமதிக்கப்பட்டு சிகிச்சை பெற்று வருகிறார். சவுமித் சாட்டர்ஜிக்கு தற்போது 85 வயது ஆகிறது. இவர் புகழ்பெற்ற டைரக்டரான சத்யஜித்ரே இயக்கத்தில் 14 படங்களில் நடித்துள்ளார். மிருணாள் சென் உள்ளிட்ட மேலும் பல பிரபல இயக்குனர்கள் படங்களிலும் நடித்து இருக்கிறார். சிறந்த நடிகருக்கான தேசிய விருது பெற்றுள்ளார். பத்ம பூஷன், தாதா சாகேப் பால்கே விருதுகளையும் வாங்கி உள்ளார். சாட்டர்ஜியின் உடல்நிலை குறித்து மேற்கு வங்க முதல்-மந்திரி மம்தா பானர்ஜி விசாரித்தார்.

இதுபோல் பிரபல தெலுங்கு நடிகர் ஹர்ஷவர்த்தன் ராணேவுக்கும் கொரோனா தொற்று ஏற்பட்டு உள்ளது. இவர் நடிகை பூமிகா தயாரித்த தகிட தகிட தெலுங்கு படத்தில் அறிமுகமானார். நயன்தாராவுடன் தமிழ், தெலுங்கில் வெளியான அனாமிகா உள்பட பல படங்களில் நடித்துள்ளார். அவர் கூறும்போது, “எனக்கு வயிற்று வலி காய்ச்சல் இருந்தது. பரிசோதனையில் கொரோனா உறுதி செய்யப்பட்டு இருப்பதால் தற்போது தனிமைப்படுத்திக் கொண்டு சிகிச்சை பெற்று வருகிறேன்” என்றார்.