'எப்பொழுதும் நீங்கள்தான் எனது உத்வேகம்' - நடிகர் ரஜினிகாந்த் பிறந்தநாளுக்கு சிவகார்த்திகேயன் வாழ்த்து

சென்னை,

பஸ் கண்டக்டராக தன் வாழ்க்கையை தொடங்கி தற்போது இந்திய சினிமாவின் சூப்பர் ஸ்டாராக உயர்ந்துள்ளவர் ரஜினிகாந்த்.இயக்குனர் பாலச்சந்தர் இயக்கிய அபூர்வ ராகங்கள் படத்தில் கமல்ஹாசன் மற்றும் ஸ்ரீவித்யா ஆகியோருடன் இணைந்து நடித்து தமிழ் திரையுலகில் ரஜினிகாந்த் அறிமுகமானார்.

இவர் தமிழ், மலையாளம், கன்னடம், இந்தி, தெலுங்கு, வங்காளம் ஆகிய 6 மொழிகளில் 169 படங்களில் நடித்து உலகம்முழுவதும் தனக்கென்று தனி ரசிகர் சாம்ராஜ்யத்தையே கட்டமைத்துள்ளார். இவரை பாராட்டும் விதமாக மத்திய அரசு 2000ம் ஆண்டு பத்ம பூஷன் விருதையும், 2016ம் ஆண்டு பத்ம விபூஷண் விருதையும் வழங்கி சிறப்பித்தது. மேலும் சினிமா துறையில் இவரின் பங்களிப்பை பாராட்டும் விதமாக 2019ம் ஆண்டு தாதா சாகேப் பால்கே விருது வழங்கி கவுரவித்தது.

இந்நிலையில் நடிகர் ரஜினிகாந்த் இன்று தனது 73வது பிறந்தநாளை கொண்டாடி வருகிறார். அவருக்கு திரைப்பிரபலங்கள் மற்றும் ரசிகர்கள் தங்கள் வாழ்த்துகளை தெரிவித்து வருகின்றனர். நடிகர் ரஜினிகாந்த் பிறந்தநாளுக்கு நடிகர் சிவகார்த்திகேயன் வாழ்த்து தெரிவித்து பதிவிட்டுள்ளார்.

ரஜினியின் தீவிர ரசிகரான இவர் தனது எக்ஸ் வலைதள பக்கத்தில், 'தலைவா... எப்பொழுதும் நீங்கள்தான் எனது உத்வேகம். என்றும் நீங்கள் நல்ல ஆரோக்கியத்துடன் இருக்க இறைவனை வேண்டுகிறேன். லவ் யு தலைவா' என்று பதிவிட்டுள்ளார்.