சி.பி.எஸ்.இ. பிளஸ்-2 தேர்வு ரத்து மகிழ்ச்சி அளிக்கிறது; மதிப்பெண் எவ்வாறு மதிப்பிடப்படும்?: சுப்ரீம் கோர்ட்டு கேள்வி

தேர்வு ரத்து

கொரோனா பரவல் காரணமாக பிளஸ்-2 பொதுத்தேர்வு தள்ளிவைக்கப்பட்டு இருந்தது. பின்னர் கொரோனா வழிகாட்டு நெறிமுறை பின்பற்றி பிளஸ்-2 தேர்வு ஜூலை 1-ந் தேதி முதல் 16-ந் தேதி வரை 2 பகுதிகளாக நடத்த திட்டமிடப்பட்டது. இதற்கிடையில், மாணவர்களின் நலன் கருதி, இந்தியா முழுவதும் சி.பி.எஸ்.இ. பொதுத்தேர்வு ரத்து செய்யப்படும் என பிரதமர் மோடி, உயர்மட்டக்குழு கூட்டத்திற்கு பிறகு அறிவித்தார்.

இதையடுத்து குஜராத், மத்தியபிரதேசம், கோவா, உத்தரகாண்ட், உத்தரபிரதேசம் ஆகிய மாநிலங்களில் பிளஸ்-2 தேர்வை ரத்து செய்து முதல்-மந்திரிகள் உத்தரவி்ட்டனர். தமிழகத்தில் பொதுத்தேர்வு நிலைப்பாடு குறித்து இன்னும் ஓரிரு நாட்களில் தெரிவிக்கப்பட உள்ளது.

இதனிடையே கொரோனா 2-வது அலை காரணமாக, சி.பி.எஸ்.இ. பிளஸ்-2 தேர்வை ரத்து செய்ய வேண்டும் என சுப்ரீம் கோர்ட்டில் வழக்கு தொடரப்பட்டது. இதனை விசாரித்த நீதிமன்றம், மத்திய அரசு பதிலளிக்க உத்தரவிட்டிருந்தது.

இந்நிலையில், தேர்வு ரத்து கோரிய வழக்கை விசாரித்த நீதிபதிகள் தங்கள் உத்தரவில் கூறியதாவது:-

பிளஸ்-2 தேர்வு ரத்து செய்யப்பட்டது மகிழ்ச்சி அளிக்கிறது. அதேநேரத்தில், மதிப்பெண் வழங்குவதற்காக மாணவர்களை மதிப்பீடு செய்வதற்கான வழிகள் என்ன என்பதை பார்க்க விரும்புகிறோம்.

மாணவர்கள் இந்தியாவில் உள்ள கல்லூரி மற்றும் வெளிநாட்டில் உள்ள கல்லூரிகளில் சேர உள்ளதால், அவர்களை மதிப்பீடு செய்வதற்கு நிறைய அவகாசம் வழங்க முடியாது. மதிப்பெண் வழங்குவது தொடர்பாக 2 வாரங்களில் அனைத்து முடிவுகளையும் மத்திய அரசு எடுக்க வேண்டும். மேலும் மத்திய அரசின் இந்த முடிவுகள், மாநில பாடத்திட்ட பிளஸ்-2 தேர்வுகளை ரத்து செய்யும் மாநில அரசுகளுக்கும் வழிகாட்டியாய் அமையும்.

இவ்வாறு நீதிபதிகள் கூறினர்.