ஆப்கானிஸ்தான் கிரிக்கெட் வாரிய தலைவர் பணி நீக்கம்

காபூல்,

ஆப்கானிஸ்தானில் 20 ஆண்டுகளுக்கு பிறகு தலீபான்கள் ஆட்சி அதிகாரத்தை கைப்பற்றியுள்ளனர். முந்தைய ஆட்சி போல இல்லாமல் மிதமான கொள்கைகளுடன் ஆட்சி நடத்துவோம் என அறிவித்த தலீபான்கள், அதற்கு நேர்மாறாக தற்போது செயல்பட்டு வருகின்றனர். 

புதிதாக அமைக்கப்பட்ட கேபினட்டில் பெண்களுக்கு இடம் அளிக்காத தலீபான்களின் செயலுக்கு எதிர்ப்புகள் கிளம்பி வருகின்றன. மேலும், பெண்கள் விளையாட்டு போட்டிகளில் பங்கேற்கவும், விளையாட்டு போட்டிகளை பார்வையிடவும் தலீபான்கள் தடை விதித்துள்ளனர். அதேபோல், மைதானத்தில் பெண் பார்வையாளர்கள் இருப்பதால் ஐபிஎல் போட்டிகளை தங்கள் நாட்டில் ஒளிபரப்ப அனுமதிக்க முடியாது என்று தலீபான்கள் அரசு அறிவித்துள்ளது.

இந்நிலையில், ஆப்கானிஸ்தான் கிரிக்கெட் வாரிய தலைவரை தலீபான்கள் அதிரடியாக பணி நீக்கம் செய்துள்ளனர். ஹமித் ஷின்வாரி ஆப்கானிஸ்தான் கிரிக்கெட் வாரிய தலைவராக செயல்பட்டு வந்தார். தற்போது, அவர் தலைவர் பதவியில் இருந்து நீக்கப்பட்டுள்ளார். 

ஹமித் ஷின்வாரிக்கு பதிலாக ஆப்கானிஸ்தான் கிரிக்கெட் வாரியத்தின் புதிய தலைவராக நசீம் கான் நியமனம் செய்யப்பட்டுள்ளார். 

டி20 உலகக்கோப்பை தொடருக்கான ஆப்கானிஸ்தான் அணியின் கேப்டன் பதவியில் இருந்து ரஷீத் கான் ராஜினாமா, ஆஸ்திரேலியாவுடனான போட்டிகள் ரத்து உள்ளிட்ட பிரச்சினைகளை சந்தித்து வரும் ஆப்கானிஸ்தான் கிரிக்கெட் வாரியத்திற்கு தற்போது புதிய தலைவர் தலீபான்களால் நியமிக்கப்பட்டுள்ள சம்பவம் முக்கியத்துவம் வாய்ந்ததாக கருத்தப்படுகிறது.