கிரிக்கெட்

விஜய் ஹசாரே கோப்பை கிரிக்கெட்: தமிழக அணி 4-வது தோல்வி + "||" + Vijay Hazare Cup Cricket 4th defeat in Tamil Nadu

விஜய் ஹசாரே கோப்பை கிரிக்கெட்: தமிழக அணி 4-வது தோல்வி

விஜய் ஹசாரே கோப்பை கிரிக்கெட்: தமிழக அணி 4-வது தோல்வி
விஜய் ஹசாரே கோப்பை கிரிக்கெட்டில் தமிழக அணி நேற்று 4-வது தோல்வியை சந்தித்தது.
சென்னை,

விஜய் ஹசாரே கோப்பைக்கான ஒரு நாள் கிரிக்கெட் போட்டி இந்தியாவில் பல்வேறு நகரங்களில் நடந்து வருகிறது. இதில் பங்கேற்றுள்ள 28 அணிகள் 4 பிரிவாக பிரிக்கப்பட்டு லீக்கில் மோதுகின்றன. இதில் ‘பி’ பிரிவில் அங்கம் வகிக்கும் நடப்பு சாம்பியன் தமிழக அணி நேற்று ஆந்திராவை எதிர்கொண்டது. சென்னையில் நடந்த இந்த ஆட்டத்தில் முதலில் பேட் செய்த ஆந்திரா 6 விக்கெட் இழப்புக்கு 276 ரன்கள் சேர்த்தது. ஸ்ரீகர் பரத் (88 ரன்), சுமந்த் (62 ரன்), ரிக்கி புய் (52 ரன்) அரைசதம் அடித்தனர்.

தொடர்ந்து ஆடிய தமிழக அணி 48.5 ஓவர்களில் 247 ரன்களுக்கு ஆல்-அவுட் ஆனது. இதன் மூலம் ஆந்திரா 29 ரன்கள் வித்தியாசத்தில் 4-வது வெற்றியை பெற்றது. தமிழக அணியில் அதிகபட்சமாக கோசிக் 56 ரன்களும், கவுசிக் காந்தி 44 ரன்களும், விக்கெட் கீப்பர் ஜெகதீசன் 40 ரன்களும் எடுத்தனர். 5-வது ஆட்டத்தில் ஆடிய தமிழக அணிக்கு இது 4-வது தோல்வியாகும். ஏற்கனவே கால்இறுதி வாய்ப்பை இழந்து விட்ட தமிழக அணி கடைசி லீக்கில் ராஜஸ்தானை நாளை மறுதினம் சந்திக்கிறது.

பெங்களூருவில் நடந்த ‘ஏ’ பிரிவு லீக் ஆட்டத்தில் பஞ்சாப்-கர்நாடகா அணிகள் மோதின. மழையால் 42 ஓவர்களாக குறைக்கப்பட்ட இந்த ஆட்டத்தில் முதலில் பேட் செய்த பஞ்சாப் அணி 3 விக்கெட் இழப்புக்கு 269 ரன்கள் எடுத்தது. சுப்மான் கில் 123 ரன்களும் (122 பந்து, 8 பவுண்டரி, 6 சிக்சர்), கேப்டன் யுவராஜ்சிங் 36 ரன்களும் (28 பந்து, 4 பவுண்டரி, ஒரு சிக்சர்) விளாசினர். சுப்மான்கில், ஜூனியர் உலக கோப்பை கிரிக்கெட்டில் தொடர்நாயகன் விருதை பெற்றவர் என்பது குறிப்பிடத்தக்கது.

அடுத்து களம் இறங்கிய கர்நாடக அணியால் 42 ஓவர்களில் 8 விக்கெட்டுக்கு 265 ரன்களே எடுக்க முடிந்தது. இதனால் 4 ரன் வித்தியாசத்தில் பஞ்சாப் அணி திரில் வெற்றியை ருசித்தது. கர்நாடகா விக்கெட் கீப்பர் லோகேஷ் ராகுல் 107 ரன்கள் (91 பந்து, 8 பவுண்டரி, 5 சிக்சர்) எடுத்தும் பலன் இல்லை.

‘டி’ பிரிவில் நடந்த ஒரு ஆட்டத்தில் ஜார்கண்ட் அணி நிர்ணயித்த 330 ரன்கள் இலக்கை சவுராஷ்டிரா அணி 48.2 ஓவர்களில் எட்டிப்பிடித்து 4 விக்கெட் வித்தியாசத்தில் வெற்றி பெற்றது. சவுராஷ்டிரா வீரர் ரவீந்திர ஜடேஜா சதம் (7 பவுண்டரி, 4 சிக்சருடன் 113 ரன்) அடித்து களத்தில் இருந்தார்.