பெண்கள் ஒரு நாள் கிரிக்கெட் போட்டியில் நியூசிலாந்து அணியிடம் இந்தியா தோல்வி

ஹாமில்டன்,

இந்தியா - நியூசிலாந்து பெண்கள் அணிகள் இடையிலான 3-வது மற்றும் கடைசி ஒரு நாள் கிரிக்கெட் போட்டி ஹாமில்டனில் நேற்று நடந்தது. இதில் முதலில் பேட் செய்த இந்திய அணி 44 ஓவர்களில் 149 ரன்களுக்கு ‘ஆல்-அவுட்’ ஆனது. அதிகபட்சமாக தீப்தி ஷர்மா 52 ரன்களும், ஹர்மன்பிரீத் கவுர் 24 ரன்களும் எடுத்தனர். நட்சத்திர வீராங்கனைகள் மந்தனா ஒரு ரன்னிலும், ஜெமிமா ரோட்ரிக்ஸ் 12 ரன்னிலும் கேட்ச் ஆனார்கள். தனது 200-வது ஒரு நாள் போட்டியில் ஆடிய கேப்டன் மிதாலி ராஜ் 28 பந்துகளில் 9 ரன் எடுத்து ஏமாற்றம் அளித்தார். நியூசிலாந்து தரப்பில் சுழற்பந்து வீச்சாளர்கள் அன்னா பீட்டர்சன் 4 விக்கெட்டும், அமெலியா கெர் 2 விக்கெட்டும், வேகப்பந்து வீச்சாளர் லியா தாஹூ 3 விக்கெட்டும் வீழ்த்தினர்.

அடுத்து களம் இறங்கிய நியூசிலாந்து அணி 29.2 ஓவர்களில் 2 விக்கெட் இழப்புக்கு 153 ரன்கள் சேர்த்து 8 விக்கெட் வித்தியாசத்தில் அபார வெற்றி பெற்றது. சுசி பேட்ஸ் (57 ரன்), கேப்டன் சட்டர்த்வெயிட் (66 ரன்) அரைசதம் அடித்தனர்.

நியூசிலாந்து அணிக்கு இது ஆறுதல் வெற்றியாகவே அமைந்தது. ஏனெனில் முதல் 2 ஆட்டத்தில் வென்று இருந்த இந்திய பெண்கள் அணி ஒரு நாள் போட்டித் தொடரை 2-1 என்ற கணக்கில் கைப்பற்றியது.

நியூசிலாந்துக்கு எதிரான முதல் 3 ஒரு நாள் போட்டியில் வெற்றி பெற்று தொடரை உறுதி செய்த இந்திய ஆண்கள் அணி ஹாமில்டனில் நடந்த அடுத்த ஆட்டத்தில் 8 விக்கெட் வித்தியாசத்தில் படுதோல்வி அடைந்தது. அதேபோல் இந்திய பெண்கள் அணியும் தொடரை வென்ற பிறகு ஹாமில்டனில் நடந்த இந்த ஆட்டத்தில் தாக்குப்பிடிக்க முடியாமல் 8 விக்கெட் வித்தியாசத்தில் தோல்வியை சந்தித்துள்ளது.