வங்காளதேசத்துக்கு எதிரான டெஸ்ட்: வலுவான நிலையில் ஆப்கானிஸ்தான்

சட்டோகிராம்,

வங்காளதேசம் - ஆப்கானிஸ்தான் அணிகள் இடையிலான டெஸ்ட் கிரிக்கெட் போட்டி சட்டோகிராமில் நடந்து வருகிறது. இதில் முதல் இன்னிங்சில் ஆப்கானிஸ்தான் 342 ரன்கள் குவித்ததை தொடர்ந்து தனது முதல் இன்னிங்சை தொடங்கிய வங்காளதேசம் 2-வது நாள் முடிவில் 8 விக்கெட்டுக்கு 194 ரன்கள் எடுத்திருந்தது.

இந்த நிலையில் 3-வது நாளான நேற்று தொடர்ந்து ஆடிய வங்காளதேசம் 205 ரன்னில் ஆல்-அவுட் ஆனது. சுழற்பந்து வீச்சாளர் ரஷித்கான் 5 விக்கெட்டுகளை சாய்த்தார். அடுத்து 137 ரன்கள் முன்னிலையுடன் 2-வது இன்னிங்சை தொடங்கிய ஆப்கானிஸ்தான் அணி ஆட்ட நேர முடிவில் 8 விக்கெட்டுக்கு 237 ரன்கள் சேர்த்துள்ளது. 17 வயதான அறிமுக வீரர் இப்ராஹிம் ஜட்ரன் (87 ரன், 6 பவுண்டரி, 4 சிக்சர்), முன்னாள் கேப்டன் அஸ்ஹார் ஆப்கன் (50 ரன்) ஆகியோர் அரைசதம் அடித்தனர். இதுவரை மொத்தம் 374 ரன்கள் முன்னிலை பெற்று வலுவான நிலையில் உள்ள ஆப்கானிஸ்தான் அணிக்கு வெற்றி வாய்ப்பு பிரகாசமாகியுள்ளது. 4-வது நாள் ஆட்டம் இன்று நடைபெறும்.