இந்தியாவில் மருத்துவர் மற்றும் மக்கள் தொகைக்கு இடையேயான விகிதம் 1:834: மக்களவையில் தகவல்

புதுடெல்லி,

நாடாளுமன்ற மக்களவையில் கேள்வி ஒன்றிற்கு எழுத்துப்பூர்வ பதிலளித்த மத்திய சுகாதார மற்றும் குடும்பநல துறை இணை மந்திரி பாரதி பிரவீன் பவார், 2014-ம் ஆண்டுக்கு முன்பு நாட்டில் மருத்துவ கல்லூரிகளின் எண்ணிக்கை 387 ஆக இருந்தது. அது 82% அதிகரித்து தற்போது 706 ஆக உள்ளது என தெரிவித்து உள்ளார்.

இதேபோன்று, 2014-ம் ஆண்டுக்கு முன்பு மருத்துவ படிப்புகளுக்கான எண்ணிக்கை 51,348 ஆக இருந்தது. அது 112% அதிகரித்து தற்போது 1,08,940 ஆக உள்ளது.

முதுநிலை படிப்புகளுக்கான எண்ணிக்கையும் 31,185 ஆக இருந்தது. அது 127% அதிகரித்து 70,674 ஆக உயர்ந்துள்ளது என்று அவர் தெரிவித்து உள்ளார்.

இந்தியாவில் மருத்துவர் மற்றும் மக்கள் தொகைக்கு இடையேயான விகிதம் 1:834 ஆக உள்ளது. இதன்படி, பதிவு செய்யப்பட்ட அலோபதி மருத்துவர்கள் 80 சதவீதம் என்ற அளவில் உள்ளனர். ஆயுஷ் மருத்துவர்கள் 5.65 லட்சம் என்றளவில் உள்ளனர்.

செவிலியர் மற்றும் மக்கள் தொகைக்கு இடையேயான விகிதம் 1:476 ஆக உள்ளது. இதன்படி, 3,61,400 செவிலியர்கள் நாட்டில் பணியில் உள்ளனர்.