கமல்ஹாசனும், நானும் வேறு, வேறு பாதையில் சென்றாலும் போய் சேரும் இடம் ஒன்று தான் ரஜினிகாந்த் பேட்டி

சென்னை,

சென்னையில் நேற்று நடைபெற்ற நெல்லை மாவட்ட ரசிகர் மன்ற நிர்வாகிகள் ஆலோசனை கூட்டம் முடிவடைந்த பின்னர் ரஜினிகாந்த் நிருபர்களுக்கு பேட்டியளித்தார். அப்போது கேட்கப்பட்ட கேள்விகளும், அதற்கு அவர் அளித்த பதில்களும் வருமாறு:-

கேள்வி:- ரசிகர் மன்ற நிர்வாகிகளை நேரில் அழைத்து சந்தித்து வருகிறீர்கள். நீங்கள் ரசிகர்களை நேரடியாக களத்தில் சந்திக்க வேண்டும் என்ற கோரிக்கை நிறைவேறுமா?

பதில்:- நேரம் வரும்போது நிச்சயமாக அது நிறைவேறும்.

கேள்வி:- தமிழக அரசு நடத்திய அனைத்துக்கட்சி கூட்டத்தில், எல்லா தலைவர்களும் பங்கேற்று இருக்கிறார்கள். இதை நீங்கள் எப்படி பார்க்கிறீர்கள்?

பதில்:- ரொம்ப நல்லது. வரவேற்கத்தக்கது.

கேள்வி:- மக்கள் பிரச்சினைகளுக்காக இதே போன்று ஒருமித்த கருத்து இருக்க வேண்டும் என்று நினைக்கிறீர்களா?

பதில்:- அப்படி நிச்சயம் இருக்கவேண்டும்.

கேள்வி:- கமல்ஹாசன் நடத்தி உள்ள முதல் அரசியல் பொதுக்கூட்டத்தை எப்படி பார்க்கிறீர்கள்?

பதில்:- ரொம்ப நன்றாக இருந்தது. நான் முழுவதுமாக எல்லாவற்றையும் பார்த்தேன். ரொம்ப நல்லா நடத்தினார். நான் ஏற்கனவே அவருக்கு வாழ்த்துகளை தெரிவித்துவிட்டேன். இந்த விழாவை பார்த்த பிறகு நான் மறுபடியும் அவருக்கு வாழ்த்துகளை தெரிவித்துக் கொள்கிறேன்.

கேள்வி:- கமல்ஹாசன் சரியான பாதையில் பயணிக்கிறார் என்று நினைக்கிறீர்களா?

பதில்:- எல்லாம் வெவ்வேறு பாதையில் போனாலும் கூட போய் சேரும் இடம் ஒன்று தான். எல்லாம்(நானும், கமல்ஹாசனும்) மக்களுக்கு நல்லது செய்வதற்காக தான்.

கேள்வி:- கமல்ஹாசன் தொடங்கி உள்ள ‘மக்கள் நீதி மய்யம்’ பற்றி உங்களுடைய பார்வை என்ன?

பதில்:- நிச்சயமாக நன்றாக இருக்கும் என்று நினைக்கிறேன். கமல்ஹாசன் நல்ல திறமைசாலி. நிச்சயம் நன்றாக நடத்துவார். மக்களுடைய நம்பிக்கையை அவர் சம்பாதிப்பார்.

இவ்வாறு அவர் பதில் அளித்தார்.