12 வருடங்களாக தொடரும் மோசமான வரலாற்றை மாற்றுமா மும்பை இந்தியன்ஸ்..? ரசிகர்கள் எதிர்பார்ப்பு

ஜெய்ப்பூர்,

10 அணிகள் பங்கேற்றுள்ள 17-வது ஐ.பி.எல். கிரிக்கெட் தொடர் இந்தியாவின் பல்வேறு நகரங்களில் நடந்து வருகிறது. விறுவிறுப்பான கட்டத்தை எட்டியுள்ள இந்த தொடரில் இன்று இரவு 7.30 மணிக்கு ஜெய்ப்பூரில் நடைபெறும் 38-வது லீக் ஆட்டத்தில் ராஜஸ்தான் ராயல்ஸ் அணி, மும்பை இந்தியன்ஸ் அணியை எதிர்கொள்கிறது.

இந்த போட்டி மும்பை ரசிகர்களுக்கு மத்தியில் மிகுந்த எதிர்பார்ப்பை உண்டாக்கி உள்ளது. ஏனெனில் 2012-ம் ஆண்டுக்கு பிறகு ஜெய்ப்பூர் மைதானத்தில் இவ்விரு அணிகள் மோதிய அனைத்து போட்டிகளிலும் ராஜஸ்தானே வெற்றி பெற்றுள்ளது.

இந்நிலையில் இன்று நடைபெறும் போட்டியில் மும்பை வெற்றி பெற்று 12 வருடங்களாக தொடரும் மோசமான வரலாற்றை மாற்றுமா? என்ற எதிர்பார்ப்பு ரசிகர்கள் மத்தியில் எழுந்துள்ளது.