பள்ளி மாணவர்களுக்கான பேச்சு, கட்டுரை போட்டி

கவிதை, கட்டுரை, பேச்சுப்போட்டிகள்

தமிழ் வளர்ச்சித்துறை சார்பில் பள்ளி, கல்லூரி மாணவர்களிடையே பேச்சாற்றலையும், படைப்பாற்றலையும் வளர்க்கும் நோக்கில் பள்ளி, கல்லூரிகளில் பயிலும் மாணவர்களுக்கு ஆண்டுதோறும் மாவட்ட அளவில் கவிதை, கட்டுரை, பேச்சுப்போட்டிகள் நடத்தப்பட்டு பரிசுகள் வழங்கப்பட்டு வருகின்றன. அந்தவகையில் கரூர் மாவட்டத்தில் 2022-23-ம் ஆண்டிற்கான மாவட்ட அளவிலான பள்ளி மாணவர்களுக்கான கவிதை, கட்டுரை, பேச்சுப்போட்டிகள் கவுண்டம்பாளையத்தில் உள்ள அரசு உயர்நிலைப்பள்ளியில் நேற்று நடைபெற்றது.

இதில் கவிதை போட்டியில் கரூர் பரணிபார்க் மெட்ரிக் மேல்நிலைப்பள்ளியில் 11-ம் வகுப்பு பயிலும் மாணவி பிரகதி முதல் பரிசும், பழைய ஜெயங்கொண்டம் அரசு மேல்நிலைப்பள்ளியில் 12-ம் வகுப்பு பயிலும் மாணவி சிவகீர்த்தனா 2-ம் பரிசும், பசுபதிபாளையம் சாரதா பெண்கள் மேல்நிலைப்பள்ளியில் 12-ம் வகுப்பு பயிலும் மாணவி கோபிகா 3-வது பரிசும் பெற்றனர்.

பாராட்டு சான்றிதழ்கள்

கட்டுரை போட்டியில் கரூர் சேரன் மெட்ரிக் மேல்நிலைப்பள்ளியில் 11-ம் வகுப்பு பயிலும் மாணவி ஸ்ரேயா முதல் பரிசும், சின்னதாராபுரம் ஆர்.என்.மெட்ரிக் மேல்நிலைப்பள்ளியில் 12-ம் வகுப்பு பயிலும் மாணவி சுபஸ்ரீ 2-ம் பரிசும், சின்னதாராபுரம் அரசு மகளிர் மேல்நிலைப்பள்ளியில் 11-ம் வகுப்பு பயிலும் மாணவி சந்தியா 3-வது பரிசும் பெற்றனர்.

பேச்சு போட்டியில் கிருஷ்ணராயபுரம் அரசு மேல்நிலைப்பள்ளியில் 11-ம் வகுப்பு பயிலும் மாணவன் சசிதரன் முதல் பரிசும், குளித்தலை அரசு பெண்கள் மேல்நிலைப்பள்ளியில் 11-ம் வகுப்பு பயிலும் மாணவி பெரியக்காள் 2-ம் பரிசும், சின்னசேங்கல் அரசு மேல்நிலைப்பள்ளியில் 11-ம் வகுப்பு பயிலும் மாணவி அருள்மணி 3-வது பரிசும் பெற்றனர்.இப்போட்டிகளில் பங்குபெற்று வெற்றி பெற்ற பள்ளி மாணவர்களுக்கு மாவட்ட அளவில் முதல் பரிசாக ரூ.10 ஆயிரமும், 2-ம் பரிசு ரூ.7 ஆயிரமும், 3-ம் பரிசு ரூ.5 ஆயிரமும் மற்றும் பாராட்டு சான்றிதழ்களும் வழங்கப்பட உள்ளன. இப்போட்டிகளில் நடுவர்களாக 9 முதுகலை தமிழ் பட்டதாரி ஆசிரியர்கள் செயல்பட்டனர் என தமிழ் வளர்ச்சி உதவி இயக்குனர் ஜோதி தெரிவித்தார்.