சென்னை மாவட்ட கூட்டுறவு சங்க உதவியாளர் பணியிடங்களுக்கு 11-ந் தேதி எழுத்துத் தேர்வு

சென்னை,

கூட்டுறவு சங்கங்களின் சென்னை மாவட்ட ஆள் சேர்ப்பு நிலையத்தின் தலைவர் வெளியிட்டுள்ள செய்திக்குறிப்பில் கூறியிருப்பதாவது:-

சென்னை மாவட்டத்தில், கூட்டுறவுச் சங்கங்களின் பதிவாளர் கட்டுப்பாட்டில் செயல்படும் கூட்டுறவுச் சங்கங்களில் காலியாக உள்ள உதவியாளர் பணியிடங்களை நேரடி நியமனம் மூலம் நிரப்புவதற்காக சென்னை மாவட்ட ஆள்சேர்ப்பு நிலையத்தால் கடந்த ஆகஸ்டு 6-ந் தேதி அறிவிக்கை வெளியிடப்பட்டது. அதற்கான எழுத்துத் தேர்வு வருகிற 11-ந் தேதி(சனிக்கிழமை) நடைபெற உள்ளது.

இத்தேர்விற்கான தேர்வுக்கூட நுழைவுச் சீட்டினை(ஹால் டிக்கெட்) 5-ந் தேதி ஞாயிற்றுக்கிழமை (நேற்று) முதல் சென்னை மாவட்ட ஆள்சேர்ப்பு நிலையத்தின் www.drbchn.in என்ற இணையதள முகவரியில் இருந்து பதிவிறக்கம் செய்து கொள்ளலாம். கூடுதல் விவரங்களுக்கு archn.rcs@gmail.com என்ற மின்னஞ்சல் மற்றும் 044 - 24614289 என்ற தொலைப்பேசி எண்ணையும் தொடர்பு கொள்ளலாம்.

இவ்வாறு அதில் கூறப்பட்டுள்ளது.