2-வது டெஸ்ட் : வங்காளதேச அணிக்கு 413 ரன்கள் இலக்கு நிர்ணயித்தது தென் ஆப்பிரிக்கா

வங்காளதேச அணி தென் ஆப்பிரிக்காவில் சுற்றுப்பயணம் மேற்கொண்டு டெஸ்ட் போட்டிகளில் விளையாடி வருகிறது. இரு அணிகளுக்கு இடையே 2-வது டெஸ்ட் போட்டி நடைபெற்று வருகிறது. இதில் டாஸ் வென்ற தென் ஆப்பிரிக்கா கேப்டன் டீன் எல்கர் முதலில் பேட்டிங் தேர்வு செய்தார்.

அதன்படி, தென் ஆப்பிரிக்கா அணி முதலில் பேட்டிங் செய்தது. தொடக்க ஆட்டக்காரர்களாக கேப்டன் டீன் எல்கர், எர்வி களமிறங்கினர். எர்வி 24 ரன்கள் எடுத்து அவுட்டானார். அடுத்து இறங்கிய பீட்டர்சன் டீன் எல்கருடன் ஜோடி சேர்ந்தார். இருவரும் பொறுப்புடன் ஆடி அரைசதம் அடித்து அசத்தினர். எல்கர் 70 ரன்களில் ஆட்டமிழந்தார். அதன்பின், களமிறங்கிய பவுமா சிறப்பாக விளையாடினார். பீட்டர்சன் 64 ரன்களிலும் பவுமா 67 ரன்களிலும் வெளியேறினர்.

முதல் நாள் முடிவில் தென் ஆப்பிரிக்கா அணி 5 விக்கெட் இழப்பிற்கு 278 ரன்கள் எடுத்திருந்தது. இந்நிலையில், இரண்டாம் நாள் ஆட்டம் நேற்று நடந்தது. கேசவ் மகாராஜா பொறுப்புடன் ஆடி அரை சதமடித்தார். அவர் 84 ரன்னில் அவுட்டானார். இறுதியில், தென் ஆப்பிரிக்கா அணி முதல் இன்னிங்சில் 453 ரன்களுக்கு ஆல் அவுட்டானது. வங்காளதேசம் சார்பில் தைஜுல் இஸ்லாம் 6 விக்கெட்டும், காலித் அகமது 3 விக்கெட்டும் வீழ்த்தினர்.

வங்காளதேசம் அணி முதல் இன்னிங்சை தொடர்ந்தது. தொடக்க ஆட்டக்காரர் தமிம் இக்பால் பொறுப்புடன் ஆடினார். அரை சதம் அடிப்பார் என எதிர்பார்க்கப்பட்ட நிலையில் 47 ரன்னில் ஆட்டமிழந்தார். நஜ்முல் ஹுசைன் ஷாண்டோ 33 ரன் எடுத்தார். இரண்டாம் நாள் ஆட்ட நேர முடிவில் வங்காளதேசம் அணி 5 விக்கெட் இழப்புக்கு 139 ரன்கள் எடுத்தது. 

இந்நிலையில் இன்று தொடங்கிய 3வது நாள் ஆட்டத்தில்  வங்காளதேச அணி சீரான இடைவெளியில் விக்கெட்டுக்களை இழந்தது.இதனால் வங்காளதேச அணி 10 விக்கெட்டுக்களை இழந்து 217 ரன்களுக்கு ஆட்டமிழந்தது  .அதிகபட்சமாக அந்த அணியில் முஷ்பிகுர் ரஹிம் 51 ரன்கள் எடுத்தார் .

இதனை தொடர்ந்து 236 ரன்கள் முன்னிலையுடன் தனது 2வது இன்னிங்க்சில் விளையாடிய தென் ஆப்பிரிக்கா அணி 6 விக்கெட் இழப்பிற்கு 176 ரன்கள் எடுத்தபோது டிக்ளேர் செய்தது.இதனால் வங்காளதேச அணிக்கு 413 ரன்கள் இலக்காக நிர்ணயித்தது தென் ஆப்பிரிக்கா.

தொடர்ந்து  விளையாடிய வங்காளதேச அணி 3ம் நாள் ஆட்ட  நேர முடிவில் 3 விக்கெட் இழப்பிற்கு 27 ரன்கள் எடுத்துள்ளது .