காயத்தால் விலகியுள்ள ஜடேஜா 20 ஓவர் உலகக்கோப்பை போட்டியில் இடம்பெற வாய்ப்பு: தலைமை பயிற்சியாளர் டிராவிட்

துபாய்,

ஆசியா கோப்பை டி20 கிரிக்கெட் தொடரின் சூப்பர் 4 சுற்று போட்டி நேற்று தொடங்கியது.

சூப்பர் 4 சுற்றின் இன்றைய ஆட்டத்தில் பெரிதும் எதிர்பார்க்கப்பட்ட இந்தியா - பாகிஸ்தான் போட்டி இன்று நடைபெற உள்ள நிலையில் இந்திய அணியின் தலைமை பயிற்சியாளர் ராகுல் டிராவிட் நேற்று செய்தியாளர்களை சந்தித்தார்.

அப்போது, "ஜடேஜாவின் முழங்காலில் காயம் ஏற்பட்டதால் அவர் ஆசிய கோப்பையில் இருந்து வெளியேறினார். உலகக் கோப்பைக்கு இன்னும் நேரம் இருக்கிறது.

எனவே, அவரை அதிலிருந்து விலக்கிவிட முடியாது. அவர் மருத்துவக் குழுவினரின் கண்காணிப்பில் உள்ளார். அதைப் பற்றி எங்களுக்கு தெளிவான விவரம் கிடைக்கும் வரை நான் அவரை நிராகரிக்கவோ அல்லது அதிகமான கருத்துக்களை வெளியிடவோ விரும்பவில்லை" என்று கூறினார்.

மேலும், இன்றைய போட்டி குறித்து டிராவிட் கூறுகையில், "ஓர் அணியை உருவாக்க முயற்சிப்பதன் முழு நோக்கமே அவர்கள் எந்த சூழ்நிலையிலும் விளையாட முடியும் என்பதற்காகவே. நாளைய போட்டியில் கவனம் செலுத்துகிறோம்.

எங்களிடம் சிறந்த பந்துவீச்சுத் தாக்குதலும் உள்ளது என்பதில் எனக்கு நம்பிக்கை உள்ளது. ஒவ்வொருவரும் நிறைய முயற்சி செய்து சாதிக்க வேண்டும் என்ற ஆர்வம் அதிகம் கொண்டுள்ளனர்.உலகக் கோப்பைக்கு இது எங்களுக்கு ஒரு பெரிய தயாரிப்பு. நாங்கள் ஒரு பெரிய அளவிலான வீரர்களை உருவாக்க முயற்சித்துள்ளோம்.

எங்களுக்கு இது மற்ற போட்டிகளை போல ஒரு போட்டி மட்டுமே. நாம் வெற்றி பெற்றால் மிகவும் நல்லது, ஒருவேளை தோற்றால் பின்னர் இலங்கைக்கு எதிராக விளையாடுவோம். எங்களிடம் நிறைய தரமான வீரர்கள் உள்ளனர். பாகிஸ்தான் நல்ல பார்மில் உள்ளது" என்றார்.

விராட் கோலியின் பார்ம் பற்றி அவர் பேசுகையில், "விராட் அல்லது எந்த வீரருடன் நான் என்ன உரையாடினேன் என்பதை என்னால் சொல்ல முடியாது. முந்தைய ஆட்டத்தில் அவர் சிறப்பாக விளையாடினார்.

ஒரு மாத இடைவெளிக்குப் பிறகு அவர் திரும்பி வந்தார். அவருக்கு ஓய்வு கிடைத்ததில் மகிழ்ச்சி மற்றும் அவர் இங்கிருந்து சிறப்பாக செயல்பட முடியும் என்று நம்புகிறேன்.விராட் சில பெரிய ஆட்டத்தை வெளிப்படுத்த ஆர்வமாக உள்ளார், அவர் சிறப்பாக செயல்பட்டதில் எனக்கு மகிழ்ச்சி.

எங்களைப் பொறுத்தவரை, அவர் எத்தனை ரன்கள் எடுத்தார் என்பது முக்கியமல்ல. எங்களைப் பொறுத்தவரை, நம் அணிக்கு உண்மையில் வெற்றி பெற விரும்பும் போது அந்த சந்தர்ப்பங்களில் ஒரு சிறிய பங்களிப்பு கூட முக்கியமானதாக கருதுகிறோம்" என்றார்.