டென்னிஸ்
விம்பிள்டன் டென்னிஸ்: வீனஸ் அதிர்ச்சி தோல்வி

விம்பிள்டன் டென்னிஸ் போட்டியில் 5 முறை சாம்பியனான அமெரிக்காவின் வீனஸ் வில்லியம்ஸ் அதிர்ச்சி தோல்வி அடைந்தார்.
லண்டன், 

விம்பிள்டன் டென்னிஸ் போட்டியில் 5 முறை சாம்பியனான அமெரிக்காவின் வீனஸ் வில்லியம்ஸ் அதிர்ச்சி தோல்வி அடைந்தார்.

போபண்ணா ஜோடி தோல்வி

‘கிராண்ட்ஸ்லாம்’ என்ற உயரிய அந்தஸ்து பெற்ற விம்பிள்டன் டென்னிஸ் போட்டி லண்டனில் நடந்து வருகிறது. ஆண்கள் ஒற்றையர் பிரிவில் நேற்று நடந்த 3-வது சுற்று ஆட்டம் ஒன்றில் தென்ஆப்பிரிக்காவின் கெவின் ஆண்டர்சன் 6-3, 7-5, 7-5 என்ற நேர் செட் கணக்கில் கோல்ஸ்கிரீபரை (ஜெர்மனி) விரட்டி 4-வது சுற்றை எட்டினார்.

மற்றொரு ஆட்டத்தில் நடப்பு சாம்பியன் ரோஜர் பெடரர் (சுவிட்சர்லாந்து) 6-3, 7-5, 6-2 என்ற நேர் செட் கணக்கில் லினார்ட் ஸ்டிரப்பை (ஜெர்மனி) வீழ்த்தி அடுத்த சுற்றை எட்டினார்.

ஆண்கள் இரட்டையர் 2-வது சுற்றில் இந்தியாவின் ரோகன் போபண்ணா, பிரான்சின் ரோஜர் வாசெலின் ஜோடி 4-6, 6-7 (4-7), 1-2 என்ற செட் கணக்கில் பிரிடெரிக் நீல்சென் (டென்மார்க்)- ஜோ சிலிஸ்பரி (இங்கிலாந்து) இணைக்கு எதிராக பின்தங்கி இருந்த போது, போபண்ணா காயமடைந்தார். இதனால் அவர் பாதியில் விலக, நீல்சென்-சிலிஸ்பரி ஜோடி வெற்றி பெற்றதாக அறிவிக்கப்பட்டது.

வீனஸ் ‘அவுட்’

பெண்கள் ஒற்றையர் 3-வது சுற்று ஆட்டம் ஒன்றில் 5 முறை சாம்பியனான வீனஸ் வில்லியம்ஸ் (அமெரிக்கா) 2-6, 7-6 (7-5), 6-8 என்ற செட் கணக்கில் நெதர்லாந்தின் கிகி பெர்டென்சிடம் அதிர்ச்சிகரமாக தோற்று வெளியேறினார்.

அதே சமயம் 7 முறை சாம்பியனான அமெரிக்காவின் செரீனா வில்லியம்ஸ் தன்னை எதிர்த்த மிலாடெனோவிச்சை (பிரான்ஸ்) 7-5, 7-6 (7-2) என்ற நேர் செட்டில் வீழ்த்தி கால்இறுதிக்கு முந்தைய 4-வது சுற்றுக்கு முன்னேறினார்.

முன்னதாக நேற்று முன்தினம் இரவு நடந்த 2-வது சுற்றில் நடப்பு சாம்பியன் கார்பின் முகுருஜா (ஸ்பெயின்) 7-5, 2-6, 1-6 என்ற செட் கணக்கில் அலிசன் வான் உய்ட்வான்கிடம் (பெல்ஜியம்) மண்ணை கவ்வினார்.