மதுரை எஸ்.ஆலங்குளம், ஆனையூர் பகுதிகளில் 5 நாட்களாக இரவில் மின் தடை; பொதுமக்கள் கடும் அவதி

மதுரை,

மதுரை மகாத்மா காந்தி நகரில் துணை மின் நிலையம் உள்ளது. இங்கிருந்து எஸ்.ஆலங்குளம், இமயம்நகர், முடக்காத்தான், ஆனையூர் உள்ளிட்ட பகுதிகளுக்கு மின் வினியோகம் செய்யப்படுகிறது. கடந்த 5 நாட்களாக இரவு 8 மணி முதல் நள்ளிரவு வரை இந்த பகுதிகளில் மின் தடை செய்யப்படுகிறது. இதனால் அப்பகுதி மக்கள் கடும் அவதிக்கு ஆளாகி உள்ளனர். இதுகுறித்து மின்வாரிய அதிகாரிகளை தொடர்பு கொண்டு அப்பகுதி மக்கள் புகார் தெரிவித்தனர். ஆனாலும் ஒவ்வொரு நாளும் இரவு நேரத்தில் பல மணி நேர மின்வெட்டு தொடர்ந்து இருந்து வருகிறது.


ஆனால் நேற்று இரவும் சரியாக 7.30 மணியளவில் எஸ்.ஆலங்குளம் மற்றும் சுற்றுப்பகுதிகளில் மின்தடை ஏற்பட்டுள்ளது. இதுபற்றி அந்த பகுதியினர் கூறுகையில், “எஸ்.ஆலங்குளம், ஆனையூர், இமயம்நகர், எஸ்.வி.பி.நகர், அன்புநகர், ஆனந்த நகர், கோசாகுளம், பனங்காடி, முடக்காத்தான், மீனாம்பாள்புரம் ஆகிய பகுதிகளில் கடந்த 5 நாட்களாக இரவு நேரத்தில் மட்டும் மின்தடை செய்யப்படுகிறது. ஆனால் அதிகாரிகள் மழுப்பலாக பதில் அளிக்கிறார்கள். குழந்தைகள், பெரியவர்கள் என அனைத்து தரப்பினரும் மின்தடையால் கடும் அவதிப்பட்டு வருகிறோம். இதற்கு நிரந்தர தீர்வு காண வேண்டும். நாளை (அதாவது இன்று) காலையில் மீண்டும் நாங்கள் சாலை மறியலில் ஈடுபட உள்ளோம்“ என்றனர்.