380 படங்களில் நடித்து ராதிகா சரத்குமார் சாதனை முதன் முதலாக நகைச்சுவை வேடத்தில் நடித்தார்

‘கிழக்கே போகும் ரெயில்’ படத்தில் கதாநாயகியாக டைரக்டர் பாரதிராஜாவினால் அறிமுகம் செய்யப்பட்ட ராதிகா சரத்குமார், இதுவரை 380 படங்களில் நடித்து இருக்கிறார். அவர் நடிக்காத வேடங்களே இல்லை என்று சொல்லும் அளவுக்கு தமிழ், மலையாளம், தெலுங்கு, கன்னடம், இந்தி ஆகிய 5 மொழி படங்களில், பலவிதமான கதாபாத்திரங்களில் நடித்து சாதனை புரிந்து இருக்கிறார்.

அவருடைய 380-வது படம், ‘அனபெல் சுப்பிரமணியம்.’ இதில், விஜய் சேதுபதி கதாநாயகனாக நடித்து வருகிறார். டைரக்டர் ஆர்.சுந்தர்ராஜனின் மகன் தீபக் இயக்கி வருகிறார். கதாநாயகியாகவும், அம்மா வேடங்களிலும் 379 படங்களில் நடித்த ராதிகா சரத்குமார், தனது 380-வது படத்தில் நகைச்சுவை வேடத்தில் நடித்து இருக்கிறார். அவர் நகைச்சுவை கதாபாத்திரத்தில் நடித்தது, இதுவே முதல்முறை. கனமான கதாபாத்திரங்களில் மட்டுமல்ல...‘காமெடி’ வேடத்திலும் திறமையான நடிப்பை வழங்க முடியும் என்று அவர் நிரூபித்து இருக்கிறார்.

படப்பிடிப்பு ராஜஸ்தான் மாநிலம் ஜெய்ப்பூரில் நடந்தது. எம்.ஜி.ஆர்.-ஜெயலலிதா நடித்த ‘அடிமைப்பெண்’ படத்தில், “ஆயிரம் நிலவே வா” பாடல் காட்சி படமாக்கப்பட்ட ஜெய்ப்பூர் அரண்மனையில், ‘அனபெல் சுப்பிரமணியம்’ படப்பிடிப்பு நடந்தது. அதில், ராதிகா சரத்குமார் 20 நாட்கள் கலந்துகொண்டு நடித்தார்.