'இந்தியன் 2' தாமதம் இந்திக்கு போகும் இயக்குனர் ஷங்கர்

ஷங்கர் இயக்கிய கமல்ஹாசனின் இந்தியன்-2 படப்பிடிப்பு விபத்து, கொரோனா பரவல், கமலுக்கு காலில் நடந்த அறுவை சிகிச்சை, தேர்தல் போன்ற காரணங்களால் தொடர்ந்து முடங்கி உள்ளது. அந்த படத்தில் இருந்து ஷங்கர் விலகியதாக வெளியான தகவலை படக்குழுவினர் மறுத்தனர். சட்டமன்ற தேர்தல் முடிந்த பிறகே இந்தியன் 2 படப்பிடிப்பில் கமல்ஹாசன் பங்கேற்பார் என்று தெரிகிறது. இதற்கிடையில் தெலுங்கில் ராம் சரண் கதாநாயகனாக நடிக்கும் படத்தை ஷங்கர் இயக்க இருக்கிறார். இதன் படப்பிடிப்பு விரைவில் தொடங்க உள்ளது. இந்த நிலையில் நேரடி இந்தி படமொன்றை இயக்கவும் ஷங்கர் முடிவு செய்து இருப்பதாக தகவல் வெளியாகி உள்ளது. பிரபல இந்தி நடிகர் ரன்வீர் சிங் சென்னை வந்து ஷங்கரை சந்தித்து பேசி உள்ளார். எனவே ரன்வீர் சிங் நடிக்கும் இந்தி படத்தை அவர் இயக்குவார் என்று கூறப்படுகிறது. இந்த படத்தை தமிழ், தெலுங்கு, மலையாளம் மொழிகளிலும் வெளியிட திட்டமிட்டு உள்ளனர். இதுபற்றிய அதிகாரப்பூர்வ அறிவிப்பு விரைவில் வெளியாகும் என்று எதிர்பார்க்கப்படுகிறது.