பிரபல கன்னட நடிகர் மரணம்

பிரபல கன்னட நடிகர் ஷங்கர் ராவ். இவர் பெங்களூருவில் குடும்பத்துடன் வசித்து வந்தார். இந்த நிலையில் ஷங்கர் ராவுக்கு திடீர் உடல்நலக்குறைவு ஏற்பட்டு மரணம் அடைந்தார். அவருக்கு வயது 84. ஷங்கர் ராவ் ஏராளமான படங்களில் நகைச்சுவை மற்றும் குணசித்திர வேடங்களில் நடித்து இருக்கிறார். புனித் ராஜ்குமார் கதாநாயகனாக அறிமுகமான அப்பு படத்தில் கல்லூரி பேராசிரியராக வந்தார். துருவாவுடனும் ஏராளமான படங்களில் நடித்துள்ளார். சில்லி லல்லி வெப் தொடரில் ஷங்கர் ராவ் நடித்த நகைச்சுவை கதாபாத்திரத்துக்கு பெரிய வரவேற்பு கிடைத்தது. பாபா பாண்டு உள்ளிட்ட மேலும் பல வெப் தொடர்களிலும் நடித்து இருக்கிறார். சில நாட்களுக்கு முன்பு மூத்த கன்னட நடிகர் கோவிந்த் ராவ் மற்றும் பிரபல நடிகர் சத்யஜித் ஆகியோர் அடுத்தடுத்து மரணம் அடைந்த நிலையில் தற்போது ஷங்கர் ராவும் இறந்து இருப்பது கன்னட திரையுலகினர் மத்தியில் சோகத்தை ஏற்படுத்தி உள்ளது.