15 நாட்களாக நீடிப்பதால் ரூ 1500 கோடி உற்பத்தி பாதிப்பு

கோவை

கூலி உயர்வு கேட்டு விசைத்தறி உரிமையாளர்கள் வேலை நிறுத்த போராட்டம் 15 நாட்களாக நீடிப்பதால் ரூ.1500 கோடி உற்பத்தி பாதிக்கப்பட்டு உள்ளது. இதனால் 5 லட்சம் தொழிலாளர்கள் வேலையை இழந்து உள்ளனர். 

கோவை மாவட்டத்தில் சோமனூர், கருமத்தம்பட்டி, சுல்தான் பேட்டை மற்றும் பல்வேறு பகுதிகளிலும், திருப்பூர் மாவட்டத்தில் பல்லடம் மற்றும் சுற்றி உள்ள பகுதிகளில்  மொத்தம் 2 லட்சம் விசைத்தறிகள் இயங்கி வருகின்றன.

 இவற்றின் மூலம் தினமும் 2 கோடி மீட்டர் காடா துணி உற்பத்தி செய்யப்பட்டு வருகிறது.  இவற்றின் மதிப்பு ரூ.100 கோடியாகும். இதன் மூலம் நேரிடையாக மற்றும் மறைமுகமாகவும் 5 லட்சம் தொழிலாளர்களுக்கு வேலை வாய்ப்பு கிடைத்து வருகிறது. 

விசைத்தறி உரிமையாளர்களுக்கு, ஜவுளி உற்பத்தியாளர்கள் 3 ஆண்டுகளுக்கு ஒருமுறை கூலி உயர்வு வழங்கி வந்தனர். இந்த நிலையில், கடந்த 2014-ம் ஆண்டு முதல் கூலி உயர்வு வழங்க வில்லை. இந்த நிலையில், புதிய கூலி உயர்வு கடந்த டிசம்பர் 1-ந் தேதி முதல் அமல்படுத்தப்படுவதாக தெரிவிக்கப்பட்டது.

அதன்படி சோமனூர் ரகங்களுக்கு 23 சதவீதம் மற்ற இதர ரகங் களுக்கு 20 சதவீதம் கூலி உயர்வு வழங்க தீர்மானிக்கப்பட்டது. ஆனால் கூலி உயர்வு அமல்படுத்தாமல் ஜவுளி உற்பத்தியாளர்கள் இழுத்தடித்து வந்ததால் விசைத்தறி உரிமையாளர்கள் கடந்த 9-ந் தேதி முதல் காலவரையற்ற வேலைநிறுத்த போராட்டத்தில் ஈடுபட்டு வருகிறார்கள். 

இந்த போராட்டம் 15-வது நாளான நேற்றும் நீடித்தது. இதனால் இந்த தொழிலை நம்பி உள்ள 5 லட்சம் தொழிலாளர்களின் வாழ் வாதாரம் பாதிக்கப்பட்டு உள்ளது. இது குறித்து கோவை மற்றும் திருப்பூர் மாவட்ட விசைத்தறி உரிமையாளர்கள் சங்க நிர்வாகிகள் கூறியதாவது:-

கடந்த 15 நாட்களாக வேலைநிறுத்தம் காரணமாக ரூ.1500 கோடிக்கு காடா துணிகள் உற்பத்தி பாதிக்கப்பட்டு உள்ளது. கூலி உயர்வு தொடர்பாக கடந்த 20-ந் தேதி கோவை தொழிலாளர் அலுவலகத்தில் நடைபெற்ற பேச்சுவார்த்தையில் உடன்பாடு ஏற்படவில்லை. 

இதையடுத்து வருகிற 27-ந் தேதி மீண்டும் பேச்சுவார்த்தை மீண்டும் நடைபெற உள்ளது. இந்த நிலையில் எங்களது கோரிக்கைகளை வலியுறுத்தி திருப்பூர் மாவட்டம் காரணம்பேட்டையில் இன்று ஆர்ப்பாட்டம் நடைபெற உள்ளது.

இவ்வாறு அவர்கள் கூறினார்கள்.