பயங்கரவாதத்திற்கு எதிரான போராட்டத்தில் இந்தியாவிற்கு துணை நிற்போம் - ஐரோப்பிய ஒன்றியக் குழு எம்பிக்கள் கூட்டாக பேட்டி

புதுடெல்லி,

காஷ்மீருக்கான சிறப்பு அந்தஸ்து வழங்கும் சட்டப்பிரிவு 370  கடந்த ஆகஸ்டு 5-ந் தேதி  ரத்து செய்யப்பட்டது.  இதைத் தொடர்ந்து அங்கு பல்வேறு கட்டுப்பாடுகள் விதிக்கப்பட்டது. 

காஷ்மீரின் கள நிலவரம் பற்றி அறிவதற்காக, ஐரோப்பிய கூட்டமைப்பை சேர்ந்த 23  எம்.பி.க்கள் இந்தியாவுக்கு வந்துள்ளனர். இவர்கள் அனைவரும் பிரதமர் மோடியை சந்தித்து பேசினர்.

பின்னர் இவர்கள் துணை ஜனாதிபதி  வெங்கய்யா நாயுடு,  தேசிய பாதுகாப்பு ஆலோசகர் அஜித் தோவல் ஆகியோரைச் சந்தித்து பேசினர். அவர்களுக்கு விருந்தளிக்கப்பட்டது.   

காஷ்மீர் கள நிலவரம் குறித்து ஐரோப்பிய யூனியனைச் சோ்ந்த 23 எம்.பி.க்கள் அடங்கிய குழு நேற்று ஆய்வு செய்தது. பின்னர் இந்த குழுவினர் ஸ்ரீநகரில்  நிருபர்களுக்கு அளித்த பேட்டியில்,

பிரான்ஸைச் சேர்ந்த ஹென்றி மலோஸ் கூறும் போது, சிறப்பு அந்தஸ்து 370 பிரிவு ரத்து என்பது இந்தியாவின் உள் விஷயம். எங்களுக்கு கவலை என்னவென்றால், பயங்கரவாதம் என்பது உலகளாவிய அச்சுறுத்தலாகும், அதை எதிர்த்துப் போராடுவதில் நாம் இந்தியாவுடன் நிற்க வேண்டும். ஐந்து அப்பாவி தொழிலாளர்களை பயங்கரவாதிகள் கொன்ற துரதிர்ஷ்டவசமான சம்பவம் நிகழ்ந்தது. நாங்கள் அதைக் கண்டிக்கிறோம். எங்கள் குழு  இராணுவம் மற்றும்  போலீசார் மற்றும் இளம் ஆர்வலர்களிடமிருந்து ஒரு விளக்கத்தைப் பெற்றது மற்றும்  அமைதி பற்றிய கருத்துக்களை பரிமாறிக்கொண்டோம் என கூறினார்.

பிரிட்டனைச் சேர்ந்த நியூட்டன் டன் கூறும் போது,  காஷ்மீரின்  சிறப்பு அந்தஸ்தை ரத்து செய்த பின்னர் நிலைமையை முதலில் மதிப்பீடு செய்வதை நோக்கமாக கொண்டது.

நாங்கள் ஐரோப்பாவைச் சேர்ந்தவர்கள், இது பல வருட சண்டைகளுக்குப் பிறகு அமைதியானதாக இருக்கிறது. இந்தியா உலகின் மிக அமைதியான நாடாக மாறுவதை நாங்கள்  காண விரும்புகிறோம். அதற்காக நாம் உலகளாவிய பயங்கரவாதத்திற்கு எதிரான போராட்டத்தில் இந்தியாவுடன் நிற்க வேண்டும். எங்கள்  வருகை அனைவருக்கும் ஒரு கண் திறப்பாக  இருக்கட்டும். மேலும் நாங்கள் இங்கு பார்த்ததை  நிச்சயமாக ஆதரிப்போம் என கூறினார்.

போலந்தை சேர்ந்த  ரைஸ்ஸார்ட் ஸார்னெக்கி கூறும் போது,  சர்வதேச ஊடகக் கவரேஜ் ஒரு பக்கச்சார்பானதாகத் தெரிகிறது. "நாங்கள் எங்கள் நாடுகளுக்குச் சென்றதும் நாங்கள் பார்த்ததை அவர்களுக்குத் தெரிவிப்போம்" என்று கூறினார்.

பிரான்சிலிருந்து வந்த தியரி மரியானி கூறும் போது,  தான் பல முறை இந்தியாவுக்கு வந்துள்ளேன்.  இந்த பயணம்  இந்தியாவின் உள் விஷயத்தில் தலையிடுவதற்கு அல்ல. ஆனால் காஷ்மீரின் கள  நிலைமை குறித்த அறிவைப் பெறுவதற்காகவே. பயங்கரவாதிகள் ஒரு நாட்டை அழிக்க முடியும். நான் ஆப்கானிஸ்தான் மற்றும் சிரியாவுக்குச் சென்றுள்ளேன், பயங்கரவாதம் என்ன செய்திருக்கிறது என்பதைக் அங்கு  கண்டேன். பயங்கரவாதத்திற்கு எதிரான போராட்டத்தில் இந்தியாவுடன் நாங்கள் துணை நிற்கிறோம்.

"எங்களை பாசிஸ்டுகள் என்று அழைப்பதன் மூலம் எங்களை களங்கப்படுத்தி உள்ளனர். எங்கள் இமேஜை  கெடுப்பதற்கு முன்பு ஒருவர் தன்னை பற்றி சரியாக அறிந்து கொள்வது நல்லது,என்று சில ஊடக  அறிக்கைகளைக்சுட்டிகாட்டி பேசினார்.