சித்திரை திருவிழாவையொட்டி பால்குட ஊர்வலம்

சூலூர்

சூலூர் மாகாளியம்மன் கோவிலில் சித்திரை திருவிழாவையொட்டி பால்குட ஊர்வலம் நடைபெற்றது.

பால்குட ஊர்வலம்

கோவை மாவட்டம் சூலூர் கலங்கல் ரோட்டில் புகழ் பெற்ற காட்டூர் மாகாளியம்மன் கோவில் அமைந்துள்ளது. இந்த கோவிலில் சித்திரை திருவிழா, கடந்த மாதம் 18-ந் தேதி தொடங்கியது. தொடர்ந்து தினமும் மதியம் 12 மணிக்கும், இரவு 7 மணிக்கும் அம்மனுக்கு சிறப்பு அலங்கார பூஜைகள் நடைபெற்றது.

இதையடுத்து நேற்று அம்மனுக்கு திருக்கல்யாணம் நடந்தது. இதையொட்டி காலை 10 மணியளவில் நொய்யல் ஆற்றின் கரையில் இருந்து அம்மனை அலங்கரித்து, மேள-தாளங்கள் முழங்க, வாண வேடிக்கைகளுடன் கோவிலுக்கு அழைத்து வரும் நிகழ்ச்சி நடந்தது.

அப்போது 1000-க்கும் மேற்பட்ட பெண்கள் பால்குடத்துடனும், திரளான ஆண்கள் தீர்த்த குடத்துடனும் ஊர்வலமாக வந்தனர்.

திருக்கல்யாணம்

பின்னர் கோவலில் அம்மனுக்கு அபிஷேக, அலங்கார பூஜை நடைபெற்றது. தொடர்ந்து மாலை 5 மணியளவில் அம்மனுக்கு திருக்கல்யாணம் நடைபெற்றது. இதில் திரளான பக்தர்கள் கலந்து கொண்டு நீண்ட வரிசையில் காத்திருந்து சாமி தரிசனம் செய்தனர்.

விழாவையொட்டி கோவில் வளாகத்தில் கடந்த 25-ந் தேதி முதல் மதியம், இரவு என 2 வேளைகளில் அன்னதான குழுவினர் சார்பில் பக்தர்களுக்கு அன்னதானம் வழங்கப்பட்டது. நேற்று சூலூர் பசும்பொன் கல்வி பண்பாட்டு சமூக அறக்கட்டளை சார்பில் அன்னதானம் வழங்கப்பட்டது. தொடர்ந்து இன்று(வியாழக்கிழமை) மஞ்சள் நீராட்டு விழா, வருகிற 9-ந் தேதி மகாமுனி, மதுரை வீரன் பூஜையுடன் திருவிழா நிறைவு பெறுகிறது.