இந்த மாதமும் நூல் விலையில் மாற்றம் இல்லை

தொடர்ந்து 2-வது மாதமாக நூல் விலையில் மாற்றம் இல்லாததால் பின்னலாடை தொழில்துறையினர் மகிழ்ச்சியடைந்துள்ளனர். மேலும் புதிய ஆர்டர்கள் கைகொடுக்குமா என்ற எதிர்பார்ப்பும் எழுந்துள்ளது.

முக்கிய மூலப்பொருள்

திருப்பூர் மற்றும் அதன் சுற்று வட்டாரத்தில் 10 ஆயிரத்திற்கும் மேற்பட்ட பின்னலாடை ஏற்றுமதி நிறுவனங்கள், ஜாப் ஒர்க் நிறுவனங்கள் மற்றும் அதை சார்ந்த நிறுவனங்கள் உள்ளன. பின்னலாடை உற்பத்திக்கு முக்கிய மூலப்பொருளாக நூல் உள்ளது.

நூல் உள்ளிட்ட மூலப்பொருட்களின் விலையை கருத்தில் கொண்டே ஆடைகளின் விலை நிர்ணயம் செய்யப்படுகிறது தொழில்துறையினர் தங்களுக்கு ஆர்டர்கள் கிடைத்தவுடன் அதற்கேற்றபடி நூல்களை மொத்தமாக கொள்முதல் செய்து ஆடைகளை தயாரிப்பது வழக்கம்.

நூல் விலையில் மாற்றம் இல்லை

கடந்த சில மாதங்களாக நூல் விலையில் அடிக்கடி மாற்றம் ஏற்பட்டு வந்ததால் தொழில்துறையினர் ஆடைகளின் விலையை நிர்ணயம் செய்வதில் குழப்பம் ஏற்பட்டு வந்தது. எனவே நூல் விலையை குறைக்க வேண்டும் என்று தொழில் துறையினர் வலியுறுத்தி வந்தனர். இந்த நிலையில் கடந்த ஜனவரி மாதம் நூல் விலை கிலோவுக்கு ரூ.20 குறைந்தது.

கடந்த மாதம் நூல் விலையில் மாற்றமில்லை. இந்த நிலையில் நடப்பு மாதத்திற்கான (மார்ச்) நூல் விலையை நூற்பாலைகள் நேற்று வெளியிட்டன. அதிலும் நூல் விலையில் எந்த மாற்றமும் இல்லை என்றும் கடந்த மாத விலையே தொடரும் என்றும் அறிவித்துள்ளனர்.

தொழில்துறையினர் மகிழ்ச்சி

இதன்படி ஒரு கிலோ 20-வது நம்பர் கோம்டு நூல் ரூ.253-க்கும், 24-ம் நம்பர் ரூ.265-க்கும், 30-ம் நம்பர் ரூ.275-க்கும், 34-ம் நம்பர் ரூ.295-க்கும், 40-ம் நம்பர் ரூ.315-க்கும், 20-ம் நம்பர் செமி கோம்டு நூல் கிலோ ரூ.245-க்கும், 24-ம் நம்பர் ரூ.255-க்கும், 30-ம் நம்பர் ரூ.265-க்கும், 34-ம் நம்பர் ரூ.285-க்கும், 40-ம் நம்பர் ரூ.305-க்கும் விற்பனை செய்யப்படுவதாக தெரிவிக்கப்பட்டுள்ளது.

தொடர்ந்து 2-வது மாதமாக நூல் விலையில் மாற்றம் இல்லாததால் திருப்பூர் பின்னலாடை தொழில்துறையினர் மகிழ்ச்சி அடைந்துள்ளனர். மேலும் கடந்த சில மாதங்களாக சரிவை சந்தித்து வந்த நிலையில் பின்னலாடை துறைக்கு புதிய ஆர்டர்கள் கைகொடுக்குமா? என்ற எதிர்பார்ப்பும் தொழில்துறையினரிடையே எழுந்துள்ளது.