பிரேசிலில் உச்சம் தொட்ட கொரோனா; ஒரே நாளில் 1.15 லட்சம் பேருக்கு பாதிப்பு
பிரேசில் நாட்டில் ஒரே நாளில் 1.15 லட்சம் பேருக்கு கொரோனா பாதிப்புகள் ஏற்பட்டு உச்ச அளவை தொட்டுள்ளன.
சாவோ பாவ்லோ,
உலக நாடுகளில் கொரோனா பாதிப்புகளில் முதல் இடத்தில் அமெரிக்கா உள்ளது. 2வது இடத்தில் இந்தியா உள்ளது. அதற்கு அடுத்து அதிக கொரோனா பாதிப்புகளை கொண்ட நாடாக பிரேசில் உள்ளது.
இந்நிலையில், பிரேசிலில் ஒரே நாளில் 1 லட்சத்து 15 ஆயிரத்து 228 பேருக்கு கொரோனா பாதிப்புகள் ஏற்பட்டு உள்ளன. இது ஒரு நாளில் பதிவாகியுள்ள உச்சபட்ச எண்ணிக்கையாகும்.
இதனால் மொத்த கொரோனா பாதிப்பு எண்ணிக்கை 1 கோடியே 81 லட்சத்து 69 ஆயிரத்து 881 ஆக உயர்வடைந்து உள்ளது என அந்நாட்டு சுகாதார அமைச்சகம் அதிர்ச்சி தெரிவித்து உள்ளது.
இதே காலகட்டத்தில் கொரோனா பாதிப்புகளால் 2 ஆயிரத்து 392 பேர் உயிரிழந்து உள்ளனர். மொத்த உயிரிழப்பு 5 லட்சத்து 7 ஆயிரத்து 109 ஆக உயர்வடைந்து காணப்படுகிறது.