இலங்கை-வெஸ்ட் இண்டீஸ் டெஸ்ட் கிரிக்கெட்: ஒரே நாளில் 20 விக்கெட்டுகள் சரிவு

பிரிட்ஜ்டவுன்,

இலங்கை - வெஸ்ட்இண்டீஸ் அணிகள் இடையிலான 3-வது மற்றும் கடைசி டெஸ்ட் கிரிக்கெட் போட்டி (பகல்-இரவு ஆட்டம்) பிரிட்ஜ்டவுனில் நடந்து வருகிறது. இதில் முதல் இன்னிங்சில் வெஸ்ட் இண்டீஸ் 204 ரன்னில் ஆல்-அவுட் ஆனதை தொடர்ந்து, தனது முதல் இன்னிங்சை ஆடிய இலங்கை அணி 2-வது நாள் முடிவில் 5 விக்கெட் இழப்புக்கு 99 ரன்கள் எடுத்திருந்தது.

இந்த நிலையில் 3-வது நாளான நேற்று முன்தினம் தொடர்ந்து பேட்டிங் செய்த இலங்கை அணி 154 ரன்னில் ஆட்டம் இழந்தது. இதையடுத்து 50 ரன்கள் முன்னிலையுடன் 2-வது இன்னிங்சை ஆடிய வெஸ்ட் இண்டீஸ் அணி 31.2 ஓவர்களில் வெறும் 93 ரன்களில் சுருண்டது. இலங்கை தரப்பில் லக்மல், கசுன் ரஜிதா தலா 3 விக்கெட்டுகளை கைப்பற்றினர்.

இதன் மூலம் நிர்ணயிக்கப்பட்ட 144 ரன்கள் இலக்கை நோக்கி 2-வது இன்னிங்சை தொடங்கிய இலங்கை அணி ஆட்ட நேர இறுதியில் 5 விக்கெட் இழப்புக்கு 81 ரன்கள் எடுத்திருந்தது. இலங்கை அணியின் வெற்றிக்கு மேற்கொண்டு 63 ரன்கள் தேவையாகும்.

3-வது நாள் ஆட்டத்தில் ஒரே நாளில் மொத்தம் 20 விக்கெட்டுகள் சரிந்தன. வெஸ்ட்இண்டீசில் நடக்கும் டெஸ்ட் ஒன்றில் ஒரே நாளில் விழுந்த அதிகபட்ச விக்கெட் எண்ணிக்கை இது தான்.