டெஸ்ட் கிரிக்கெட் புதிய தரவரிசை: விராட் கோலி முன்னேற்றம்

துபாய்,

டெஸ்ட் கிரிக்கெட் வீரர்களின் புதிய தரவரிசை பட்டியலை ஐ.சி.சி. நேற்று வெளியிட்டது. 

பேட்டிங் தரவரிசையில் இந்தியாவின் விராட் கோலி 2 இடம் உயர்ந்து 7-வது இடத்தை பிடித்துள்ளார். தென்ஆப்பிரிக்காவுக்கு எதிரான கடைசி டெஸ்டில் 79 மற்றும் 29 ரன்கள் வீதம் எடுத்ததன் மூலம் இந்த ஏற்றம் கிடைத்துள்ளது. இதே டெஸ்டில் சதம் அடித்த இந்திய விக்கெட் கீப்பர் ரிஷாப் பண்ட் 10 இடங்கள் எகிறி 14-வது இடத்தை பெற்றுள்ளார். 

ஆஷஸ் கடைசி டெஸ்டில் சதம் விளாசிய ஆஸ்திரேலியாவின் டிராவிஸ் ஹெட் 7 இடங்கள் முன்னேறி 5-வது இடத்தை பிடித்துள்ளார். ஆஸ்திரேலியாவின் லபுஸ்சேன் முதலிடத்தில் நீடிக்கிறார். பந்து வீச்சாளர்களின் தரவரிசையில் கம்மின்ஸ் (ஆஸ்திரேலியா), அஸ்வின் (இந்தியா) மாற்றமின்றி டாப்-2 இடங்களில் தொடருகிறார்கள். இந்தியாவின் பும்ரா 13-ல் இருந்து 10-வது இடத்துக்கு வந்துள்ளார்.