பவன் கல்யாணின் "ஹரி ஹர வீரமல்லு" புதிய ரிலீஸ் தேதி வெளியீடு

பவர் ஸ்டார் பவன் கல்யாண் அரசியல்வாதியும், தெலுங்கு சினிமாவின் முன்னணி நடிகரும் ஆவார். 'அக்கட அம்மாயி இக்கட அப்பா' என்ற திரைப்படத்தில் நடிகராக அறிமுகமானார். பின்னர் இவர் நடித்த படங்கள் தொடர்ச்சியாக பிளாக்பஸ்டர் படங்களாக அமைந்தன. இவர் தற்போது 'ஹரி ஹர வீரமல்லு' என்ற படத்தில் நடித்து முடித்துள்ளார். கிரிஷ் மற்றும் ஜோதி கிருஷ்ணா இயக்கி உள்ள இந்த படத்திற்கு கீரவாணி இசை அமைத்திருக்கிறார். இப்படத்தில் நாயகியாக நிதி அகர்வால் நடித்துள்ளார். இப்படம், தமிழ், தெலுங்கு, இந்தி, மலையாளம் மற்றும் கன்னட மொழியில் ஒரு பான் இந்தியா படமாக வெளியாக உள்ளது.

இந்த படத்தில் இடம் பெற்றுள்ள 'கேட்கணும் குருவே' என்று தொடங்கும் முதல் பாடலை நடிகர் பவன் கல்யாண் பாடியிருந்தார். பவன் கல்யாண் பாடிய பாடலின் படப்பிடிப்பு வீடியோ வெளியாகி வைரலானது.

இப்படம், தமிழ், தெலுங்கு, இந்தி, மலையாளம் மற்றும் கன்னட மொழியில் பான் இந்தியா படமாக கடந்த மாதம் 28-ம் தேதி வெளியாக இருந்தது. ஆனால், அப்போது வெளியாகாத இப்படம் கடந்த 9-ம் தேதி வெளியாகும் என்று அறிவிக்கப்பட்டது.ஆனால், அப்போதும் வெளியாகவில்லை.

இந்நிலையில், 'ஹரி ஹர வீரமல்லு' படம் ஜூன் 12ம் தேதி வெளியாகுமென அறிவிக்கப்பட்டுள்ளது. பவன் கல்யாண், துணை முதல்வரான பிறகு வெளியாகும் முதல் படமென்பதால் இப்படத்தின் மீது அதிக எதிர்பார்ப்பு எழுந்துள்ளது

தெலுங்கு சினிமாவின் முன்னணி நடிகரான பவன் கல்யாண், ஜன சேனா கட்சியை துவக்கி, தற்போது ஆந்திராவின் துணை முதல்வராக உயர்ந்துள்ளது குறிப்பிடத்தக்கது.