புரோ கபடி லீக்: ‘பிளே-ஆப்’ சுற்று இன்று தொடக்கம்

புதுடெல்லி,

12-வது புரோ கபடி லீக் தொடர் கடந்த ஆகஸ்டு 29-ந் தேதி தொடங்கி பல்வேறு நகரங்களில் நடந்து வந்தது. இதில் பங்கேற்ற 12 அணிகளும் தலா 18 ஆட்டங்களில் ஆடின. லீக் சுற்று முடிவில் முதல் 8 இடங்களை பிடித்த புனேரி பால்டன், தபாங் டெல்லி, பெங்களூரு புல்ஸ், தெலுங்கு டைட்டன்ஸ், அரியானா ஸ்டீலர்ஸ், யு மும்பா, பாட்னா பைரட்ஸ், ஜெய்ப்பூர் பிங்க் பாந்தர்ஸ் அணிகள் ‘பிளே-ஆப் சுற்றுக்கு முன்னேறின.

உ.பி. யோத்தாஸ், தமிழ் தலைவாஸ், குஜராத் ஜெயன்ட்ஸ், பெங்கால் வாரியர்ஸ் ஆகிய 4 அணிகள் அடுத்த சுற்று வாய்ப்பை இழந்து வெளியேறின. இந்த போட்டி தொடரின் பிளே-ஆப் சுற்று டெல்லியில் அரங்கேறுகிறது. புள்ளி பட்டியலில் டாப்-2 இடங்களை பிடித்த அணிகள் இறுதிப்போட்டிக்கான முதலாவது தகுதி சுற்றில் மோதும். இதில் வெற்றி பெறும் அணி நேரடியாக இறுதிப்போட்டிக்கு முன்னேறும்.

தோல்வியை தழுவும் அணி, வெளியேற்றுதல் சுற்று மூலம் ஏற்றம் காணும் அணியை 2-வது தகுதி சுற்றில் சந்திக்கும். இதில் வெற்றி பெறும் அணி 2-வது அணியாக இறுதிப்போட்டிக்குள் அடியெடுத்து வைக்கும்.

டெல்லியில் உள்ள தியாகராஜ் உள்விளையாட்டு அரங்கில் இன்று (சனிக்கிழமை) நடக்கும் பிளே-ஆப் சுற்று ஆட்டம் ஒன்றில் புள்ளிப்பட்டியலில் 5-வது இடம் பிடித்த நடப்பு சாம்பியனான அரியானா ஸ்டீலர்ஸ், 8-வது இடத்தை பெற்ற ஜெய்ப்பூர் பிங்க் பாந்தர்சை (இரவு 8 மணி) சந்திக்கிறது.

மற்றொரு ஆட்டத்தில் 6-வது இடத்தில் உள்ள யு மும்பா, 7-வது இடம் வகிக்கும் பாட்னா பைரட்சை (இரவு 9 மணி) எதிர்கொள்கிறது. இவ்விரு ஆட்டங்களிலும் வெற்றி பெறும் அணிகள் வெளியேற்றுதல் சுற்றில் முன்னேற்றம் காணும். தோல்வி அடையும் அணிகள் போட்டியில் இருந்து நடையை கட்டும்.