குடோனில் பதுக்கி வைத்திருந்த ரூ.3.38 கோடி வெளிநாட்டு சிகரெட், பணம் பறிமுதல்

மும்பை,

மும்பை முசாபிர்கானா பகுதியில் உள்ள குடோனில் வெளிநாட்டு சிகரெட்டுகள் பதுக்கி வைக்கப்பட்டு இருப்பதாக வருவாய் புலனாய்வு பிரிவு அதிகாரிகளுக்கு ரகசிய தகவல் கிடைத்தது. இதனை தொடர்ந்து அதிகாரிகள் அந்த பகுதிக்கு சென்று 5 குடோன்களில் அதிரடி சோதனை நடத்தினர்.

இந்த சோதனையின் போது, அங்கு ஏராளமான சிகரெட் பாக்கெட்டுகள் இருந்ததை கண்டுபிடித்து பறிமுதல் செய்தனர். மொத்தம் அந்த பாக்கெட்டுகளில் 7 லட்சத்து 32 ஆயிரம் சிகரெட்டுகள் இருப்பது தெரியவந்தது. இவற்றின் மதிப்பு ரூ.1 கோடியே 7 லட்சம் ஆகும்.

இதே போல அங்கு பதுக்கி வைக்கப்பட்டு இருந்த ரூ.2 கோடியே 31 லட்சம் ரொக்கமும் சிக்கியது. அவற்றையும் அதிகாரிகள் கைப்பற்றினர். இது தொடர்பாக 2 பேர் கைது செய்யப்பட்டனர்.

விசாரணையில், அவர்கள் வெளிநாட்டில் இருந்து சிகரெட்டுகளை மும்பைக்கு கடத்தி வந்து நாட்டின் மற்ற இடங்களுக்கு வினியோகம் செய்து வந்தது தெரியவந்தது. குடோனில் இருந்து பறிமுதல் செய்யப்பட்ட வெளிநாட்டு சிகரெட் மற்றும் பணத்தின் மொத்த மதிப்பு ரூ. 3 கோடியே 38 லட்சம் ஆகும்.